नवलपुर । मध्यविन्दु जिल्ला अस्पतालमा एचआइभी सङ्क्रमितले सेवन गर्ने औषधी वितरण तथा उपचार केन्द्र (एआरटी) केन्द्र स्थापना गर्न माग गरिएको छ । नवलपरासी जिल्लामा रहेर एचआइभी सङ्क्रमित तथा प्रभावितहरूको उपचार,हेरचाह, वकालत र एचआइभी न्यूनीकरणमा लामो समयदेखि काम गर्दै आएको संस्था लुम्बिनी प्लसले सङ्क्रमितलाई सहज रूपमा औषधी सेवन गर्ने व्यवस्थाका लागि जिल्ला अस्पतालमा एआरटी केन्द्र स्थापनाको लागि माग गरेको हो ।
लुम्बिनी प्लसका अध्यक्ष निर्मला पौडेलले जिल्ला अस्पतालमा एआरटी केन्द्र स्थापनाको माग सहित मङ्गलवार अस्पताललाई ध्यानाकर्षण पत्र बुझाउनु भएको छ । जिल्ला अस्पतालमा एआरटी केन्द्र रहने गरी कर्मचारीको व्यवस्थापन भएकोमा लामो समय बितिसक्दा समेत जिल्ला अस्पतालबाट एआरटी वितरण नभएकाले अस्पतालको ध्यानाकर्षण गराएको संस्थाका अध्यक्ष पौडेलले बताउनुभयो ।
कर्मचारी केन्द्रबाट पठाइसकेको अवस्थामा जिल्ला अस्पतालबाट सेवा सुरु हुनु सङ्क्रमितहरूले सहज रूपमा स्वास्थ्य सेवा प्राप्त गर्ने अधिकारको हनन् भएको उहाँले बताउनुभयो ।
चोरमाराको स्वास्थ्य केन्द्रबाट एआरटी वितरण हुँदै आएकोमा जिल्लाको भौगोलिक बनावटका कारण उक्त केन्द्र सबैका लागि पायक नपरेको साथै मध्यविन्दु जिल्ला अस्पताल निर्माण पछि, जिल्ला अस्पतालमा अन्य स्वास्थ्य जाँच पनि हुने र एआरटी सेवा लिन सबैका लागि पायक पर्ने हिसाबले जिल्ला अस्पतालमा एआरटी केन्द्र सञ्चालनमा ल्याउनुपर्ने उहाँले बताउनुभयो ।
जिल्ला अस्पतालमा एआरटी केन्द्र स्थापना नहुँदा कतिपय बिरामी चोरमारा पायक नपर्ने र सबै स्वास्थ्य जाँचको सुविधा नहुँदा भरतपुर जानुपर्ने बाध्यता रहेको संस्थाका अध्यक्ष पौडेलले बताउनुभयो ।
