पुरूषोत्तम सुबेदी/नवलपरासी, – थारु मिलन केन्द्र नेपाल र उपदान कलेक्सन सेन्टरले पश्चिम नवलपरासीका सामुदायिक विद्यालयहरूमा अध्ययनरत गरिब, विपन्न तथा जेहेन्दार विद्यार्थीहरूलाई पोशाक तथा शैक्षिक सामग्री वितरण गर्ने आफ्नो सहकार्यलाई निरन्तरता दिएका छन्।
आज यसै क्रममा सरावल २, दगीयास्थित जनता आधारभूत विद्यालयका ४३ जना विद्यार्थीहरूलाई पोशाक र शैक्षिक सामग्री वितरण गरिएको छ।
सामग्री वितरण समारोहमा प्रमुख अतिथि एवं उपदान कलेक्सन सेन्टरकी दाता निसा योगीले विद्यार्थीहरू भविष्यका कर्णधार भएकाले उनीहरूलाई सानो सहयोगले पनि ठूलो फरक पार्ने उद्देश्यले यो सहयोग गरेको बताउनुभयो।
कार्यक्रममा थारु मिलन केन्द्र नेपाल र उपदान कलेक्सन सेन्टरका सदस्य तथा सरावल गाउँपालिकाका पूर्व अध्यक्ष राधेश्याम चौधरीले संस्थाले सामुदायिक विद्यालयमा गरिब र विपन्न समुदायका विद्यार्थीहरूलाई पोशाक तथा शैक्षिक सामग्री वितरण गर्ने कार्यक्रम रहेको जानकारी दिनुभयो।
थारु मिलन केन्द्रका संयोजक देवानन्द सिंह फौजदारले गरिब र विपन्न समुदायका बालबालिकालाई अध्ययनमा केही भए पनि सहयोग पुगोस् भन्ने उद्देश्यले यस्ता कार्यहरू गरिएको स्पष्ट पार्नुभयो।
यसैबीच, उपदान कलेक्सन सेन्टरकी दाता निसा योगीलाई आज थारु मिलन केन्द्र नेपालको नवलपरासी कार्यालयमा सम्मान गरिएको छ। सो अवसरमा सहयोगी दाता योगीले नवलपरासीमा विभिन्न सामुदायिक क्षेत्रमा सहयोग गर्न पाएकोमा खुसी व्यक्त गर्नुभएको थियो ।
