परासी/अख्तियारद्वारा रुपन्देही भैरहवा नापी कार्यालयका प्रमुख सुग्रीव यादव बिरुद्ध अवैध सम्पत्तिका विषयमा विशेष अदालतमा भ्रष्टाचार मुद्दा दायर गरेको छ ।
आरोपी यादबले नापीका विभागीय प्रमुख र राजनीतिकर्मीलाई बिबिध प्रभावमा पारेर निमित्त नापी कार्यालय प्रमुखको जिम्मेवारी प्राप्त आर्थिक चलखेल र अकूत सम्पत्ति आर्जन गरेको अख्तियारले ठहर गरेको छ ।
यादवमाथि ५ करोड ७९ लाख ६२ हजार ४४० रूपैयाँ अवैध सम्पत्ति रहेको ठहरसहित अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको हो ।
यादवले उपसचिवसरहको प्रमुख रहने दरबन्दी रिक्त बनाई, विदेश पढ्न गएका कर्मचारीको पद र दरबन्दी कायम गरी यादवले दशौं वर्ष निमित्त हाकिम चलाएर सरकारी सार्वजनिक जग्गा हाल साबिक, प्लट मिलान, सार्वजनिक जग्गा व्यक्तिको नाउँमा पारी करौडौंको आर्थिक चलखेल गरेको अख्तियारले जनाएको छ ।
यादव र परिवारको २०५३ असार १३ देखि ८१ असार १६ सम्मको सम्पत्ति विवरण जाँच गर्दा तलभ भत्तासहित कुल वैध आय ९ करोड ३ लाख ९५ हजार ४४४ देखिएको अख्तियारको विज्ञप्तिमा उल्लेख छ । सोही अवधिमा जग्गा खरिद, घर निर्माण, शेयर खरिद, सवारी साधन खरिद, व्यवसायिक लगानीको रकम हिसाब गर्दा व्ययतर्फ १४ करोड ८३ लाख ५७ हजार ८८४ रूपैयाँ खर्च भएको बताइएको छ ।
आयव्ययको लेखाजोखा गर्दा यादवको ५ करोड ७९ लाख ६२ हजार ४४० रूपैयाँ गैरकानूनी देखिएको सहायक प्रवक्ता गणेशबहादुर अधिकारीले बताए ।
अवैध सम्पत्ति आर्जनबाट उनले श्रीमती गायत्री यादव, छोराहरु सुधान्सु यादव र शुभम यादवका नाममा खरिद गरेका सम्पत्ति समेत जफतको माग गर्दै तीन जनालाईनै प्रतिवादी बनाइ मुद्दा दायर गरीएको अख्तियार-टंगालले जनाएको छ ।
