काठमाडौं, १४ नोभेम्बर २०२५ — पाकिस्तानका शैक्षिक संस्थाबाट अध्ययन गरेका नेपाली विद्यार्थीहरूलाई सम्मान गर्ने परम्परा जारी राख्दै पाकिस्तान दूतावासले काठमाडौंको सोाल्टीमा वार्षिक एलुम्नाई गेट–टुगेदर गाला आयोजना गर्यो। कार्यक्रममा करिब ४५० जना एलुम्नाई, विशिष्ट अतिथिहरू तथा पाकिस्तानका मित्रहरू सहभागी भएका थिए।
कार्यक्रममा पाकिस्तान सरकारले उपलब्ध गराउने विभिन्न छात्रवृत्ति योजनामा अध्ययन सम्पन्न गरेका विद्यार्थीहरूका साथै स्व–वित्त योजनामा अध्ययन गरेका स्नातकहरू पनि सहभागी थिए। एलुम्नाईहरूले आपसी भेटघाट, पुराना स्मृतिहरूको पुनःस्मरण तथा दुवै देशका जनताबीचको मित्रतापूर्ण सम्बन्धलाई अझ मजबुत बनाउन अवसर पाए।
कार्यक्रमलाई सम्बोधन गर्दै नेपालका लागि पाकिस्तानका राजदूत श्री अब्रार एच. हाश्मीले यस्ता कार्यक्रमहरूले नेपाल–पाकिस्तानबीचको आपसी बुझाइ तथा सांस्कृतिक र शैक्षिक सम्बन्ध बलियो बनाउन महत्वपूर्ण भूमिका खेल्ने बताउनुभयो। उहाँले पाकिस्तानमा अध्ययन गर्ने क्रममा नेपाली विद्यार्थीहरूले त्यहाँको संस्कृति, खानपान र आतिथ्यका उत्कृष्ट अनुभवहरू बटुलेको उल्लेख गर्दै ती स्मृतिहरूले दुवै मुलुकका जनताबीचको सम्मान र मित्रता अझ प्रगाढ बनाएको बताउनुभयो।
राजदूत हाश्मीले पाकिस्तानका शैक्षिक संस्थाबाट स्नातक भएका ४ हजारभन्दा बढी नेपाली आज नेपाल तथा विश्वभरि विभिन्न क्षेत्रमा उल्लेखनीय योगदान गर्दै आएको जानकारी दिनुभयो।
एलुम्नाईहरूले दूतावासले एलुम्नाई समुदायलाई विस्तार र सक्रिय बनाउने प्रयासको प्रशंसा गर्दै नेपाल–पाकिस्तानबीचको सांस्कृतिक, शैक्षिक तथा जनस्तरको सम्बन्धलाई अझ मजबुत बनाउन निरन्तर सहयोग गर्ने प्रतिबद्धता व्यक्त गरे। साथै, सहभागीहरूले सूचना प्रविधि (IT), कृत्रिम बुद्धिमत्ता (AI), मेडिकल इनोभेसन तथा आवश्यकता अनुसारका नयाँ शैक्षिक क्षेत्रमा तालिम र अध्ययनको आवश्यकता औंल्याए।
कार्यक्रमको मुख्य आकर्षण पाकिस्तान–नेपाल एलुम्नाई नेटवर्क घोषणा थियो, जसप्रति सहभागी एलुम्नाईहरूले उच्च उत्साह व्यक्त गरे।
