नेपालका लागि अष्ट्रेलियाली राजदूत हे.ई. लियन जोन्सटन र शिक्षा, विज्ञान तथा प्रविधि मन्त्रालयका सचिव श्री चूडामणि पौडेलले १९ जना नेपाली विद्यार्थीलाई प्रतिष्ठित अष्ट्रेलिया अवार्ड्स छात्रवृत्ति प्रदान गर्नुभएको छ। यसमार्फत विद्यार्थीहरू सन् २०२६ देखि अष्ट्रेलियाका विश्वस्तरीय विश्वविद्यालयमा स्नातकोत्तर (मास्टर्स) अध्ययन सुरु गर्नेछन्।

यस वर्षको छात्रवृत्ति प्राप्तकर्तामध्ये १३ जना सार्वजनिक सेवा क्षेत्रका, ११ जना महिला तथा २ जना अपांगता भएका व्यक्ति रहेका छन्, जसले समावेशीता र विविधताको प्रतिनिधित्व गर्दछ।

समारोहमा सचिव पौडेलले छात्रवृत्ति पाउने सबैलाई बधाई दिँदै भने,
“अष्ट्रेलियामा प्राप्त हुने ज्ञान, सीप, अन्तर्राष्ट्रिय exposure र विश्वव्यापी सञ्जालले विद्यार्थीहरूको पेशागत विकासमा ठूलो योगदान पुर्‍याउनेछ। यसले नेपालका लागि सक्षम मानव संसाधन निर्माणमा महत्वपूर्ण भूमिका खेल्नेछ।”

त्यसैगरी राजदूत जोन्सटनले छात्रवृत्ति प्राप्तकर्तालाई आफ्नो अवसरको अधिकतम उपयोग गर्न आग्रह गर्दै भने,
“अष्ट्रेलिया अवार्ड्स कार्यक्रमले हाम्रा दुई देशबीचको मजबूत साझेदारी र समावेशीता, शिक्षा तथा नेतृत्वको साझा प्रतिबद्धतालाई प्रतिबिम्बित गर्छ। यस वर्षको समुहको विविधताप्रति हामी गर्वित छौँ।”

अष्ट्रेलिया अवार्ड्स छात्रवृत्ति, अष्ट्रेलियाली सरकारको परराष्ट्र मन्त्रालय (DFAT) द्वारा वित्तपोषित, एक परिवर्तनकारी उच्च शिक्षा अवसर हो। यसले भावी नेतृत्वकर्ताहरुलाई आफ्नो सीप, ज्ञान र सम्बन्ध विस्तार गर्दै घर फर्किएपछि राष्ट्रको विकासमा योगदान गर्न सक्षम बनाउँछ।

सन् १९५० को कोलम्बो प्लानदेखि अहिलेसम्म विश्वभरका १ लाखभन्दा बढी व्यक्तिले अष्ट्रेलियाली सरकारका छात्रवृत्तिहरू प्राप्त गरिसकेका छन्। हालसम्म १,३०० भन्दा बढी नेपाली विद्यार्थीहरूले अष्ट्रेलिया अवार्ड्समार्फत अष्ट्रेलियामा अध्ययन तथा अनुसन्धान गरिसकेका छन्।

अष्ट्रेलिया अवार्ड्स छात्रवृत्तिको अर्को चरणको आवेदन सन् २०२६ फेब्रुअरीमा खुल्नेछ।