पश्चिम नवलपरासी प्रहरीले जेन्जी आन्दोलनका क्रममा कारागारबाट फरार रहेका एक कैदीलाई लागुऔषधसहित पक्राउ गरेको छ।
जिल्ला प्रहरी कार्यालय नवलपरासी (पश्चिम)का अनुसार साउन ७ गते बर्दघाटबाट फरार रहेका बर्दघाट नगरपालिका–४ निवासी ४५ वर्षीय टोपबहादुर परियारलाई खोजतलासका क्रममा पक्राउ गरिएको हो। प्रहरीले उनीसँगै देवीनगर निवासी ३० वर्षीय सञ्जय दर्जीलाई पनि शंकास्पद अवस्थामा नियन्त्रणमा लिएको जनाएको छ।
घर खानतलासीका क्रममा टोपबहादुर परियारको कोठाबाट Spas Proxymec नामका १७ क्याप्सुल, Nitazsacen का १६ ट्याब्लेट र करिब ८०५ ग्राम गाँजा बरामद भएको प्रहरीले जनाएको छ। साथै, सञ्जय दर्जीको साथबाट Spas Proxymec का ४ क्याप्सुल समेत फेला परेको छ।
दुवै जनालाई पक्राउ गरी लागुऔषध सम्बन्धी कसुरमा म्याद थप गरेर थप अनुसन्धान भइरहेको जिल्ला प्रहरी कार्यालय नवलपरासी (पश्चिम)ले जनाएको छ।
