सुस्ता पूगे सांसद खनाल: तटबन्ध लगायत समस्या हल गर्न देखिए प्रतिबद्ध

पुरुषोत्तम सुवेदी
पश्चिम नवलपरासी , चैत १६ /  पश्चिम नवलपरासी निर्वाचन क्षेत्र नं. १ का नवनिर्वाचित प्रतिनिधि सभा बिक्रम खनाल सुस्ताबासीको समस्या बुझ्न सुस्ता पुगेर सुस्ताबासीले भोग्दै आएका नदी नियंत्रण लगाएतका विविध समस्याहरू हल गर्न चासो देखाऊनु भएको छ।सांसद खनालको निर्वाचन क्षेत्रमा रहेको सुस्ताका स्थानीय संग पुगी विद्यमान समस्याहरूका बारेमा विस्तृत छलफल गर्नुभयो। स्थानीयले मुख्यगरी नारायणी नदीको कटान र बर्सेनि हुने डुबानको स्थायी समाधान , सुस्ताबासीले वर्षौँदेखि उठाउँदै आएको लालपुर्जा र नागरिकता सम्बन्धी कानुनी जटिलता र शिक्षा, स्वास्थ्य र यातायातका क्षेत्रमा रहेका आधारभूत समस्याहरू विषयहरूमा सांसद खनालको ध्यानाकर्षण गराएका छन् ।
सांसद खनालले सुस्ताबासीका ती समस्या समाधानका लागि आफूले सदन र सरकार दुवै तहमा बलियो आवाज उठाउने प्रतिबद्धता व्यक्त गर्नुभयो। सुस्ताको भूमि जोगाउन भइरहेको तटबन्ध निर्माण कार्यको समेत उहाँले अनुगमन गर्नुभयो। तटबन्ध निर्माणमा देखिएको नदीजन्य पदार्थको अभाव र अन्य प्राविधिक अड्चन सुल्झाउन उहाँले सुस्ता गाउँपालिकाका अध्यक्ष टेक नारायण उपाध्याय र वडा अध्यक्ष प्रभुनाथ यादवसँग समन्वय गरी कामलाई तीव्रता दिन आग्रह गर्नुभयो।
उहाँले सुस्ताको माटो र नागरिकको सुरक्षा आफ्नो प्राथमिकतामा रहेको बताउँदै भन्नुभयो, “म यहाँका समस्या बुझ्न आएको हुँ, अब यी समस्याको समाधानका लागि कुनै कसर बाँकी राख्ने छैन।”
सिँचाइ तथा जलस्रोत व्यवस्थापन आयोजनामार्फत निर्माणको जिम्मेवारी पाएका केडि कन्ट्रक्सन र कन्ट्याक्ट नेपाललाई उहाँले ढिलासुस्ती नगर्न र गुणस्तरीय काम समयमै सम्पन्नगर्न सबै निकायलाई निर्देशन दिनु भयो ।