भक्तपुरको मध्यपुर थिमी नगरपालिका–८ का ४ सय २१ जना स्वबासीलाई जग्गाधनी दर्ता प्रमाण पुर्जा वितरण गरिएको छ।
लामो समयदेखि जग्गाधनी प्रमाण पुर्जाको प्रतीक्षामा रहेका स्वबासीलाई एक कार्यक्रमबीच पुर्जा वितरण गरिएको हो।
भूमि व्यवस्था, सहकारी तथा गरिबी निवारण मन्त्री प्रतिभा रावलको तर्फबाट भक्तपुर–२ का प्रतिनिधिसभा सदस्य राजिव खत्रीको प्रमुख आतिथ्यमा कार्यक्रम सम्पन्न भएको हो। कार्यक्रममा भक्तपुर–१ का सांसद रुकेश रन्जित, समानुपातिक सांसदहरू कुषुम महर्जन र प्रमिला कुलुजु तथा मध्यपुर थिमी नगरपालिकाका नगरप्रमुख सुरेन्द्र श्रेष्ठको उपस्थिति थियो।
कार्यक्रममा सांसद खत्रीले सुकुम्बासी समस्या नभई सुकुम्बासीका नाममा राजनीति गर्नेहरू समस्या भएको टिप्पणी गर्नुभयो। वर्षौंको प्रतीक्षापछि मध्यपुर थिमी–८ का स्वबासीले लालपुर्जा पाउनु खुशीको विषय भएको उहाँले बताउनुभयो।
‘स्वबासी र सुकुम्बासीका नाममा राजनीति गर्नेहरूले दिन नसकेको लालपुर्जा अहिले वितरण भएको छ,’ खत्रीले भन्नुभयो, ‘यत्रो वर्ष यो हक–अधिकार कसले खोस्यो भन्ने प्रश्न फेरि स्पष्ट भएको छ।’ उहाँले सुकुम्बासीका नाममा राजनीति गर्नेहरू नै वास्तविक समस्या रहेको दाबी गर्नुभयो।