परासी । जिल्ला प्रहरी कार्यालय पश्चिम नवलपरासीको नवनिर्मित चार ओटा भवनको उद्घाटन गरिएको छ । नवनिर्मित भवनको सोमवार नेपाल प्रहरीका अतिरिक्त महानिरीक्षक (एआईजी) पुजा सिंहले उद्धाटन गर्नुभएको हो । भवनको उद्घाटन गर्दै एआईजी सिंहले कुनै लोभ लालचमा तस्करी नियन्त्रणमा प्रभावकारी ढंगले काम गर्न प्रहरीलाई निर्देशन दिनुभएको छ । प्रहरीको जागिर सेवा भावले प्रदान गरिने जागिर भएकाले निष्पक्ष रुपमा काम गर्न प्रहरी लाग्नुपर्नेमा उहाको जोड थियो ।
कार्यक्रममा रामग्राम नगरपालिकाका प्रमुख धनपत यादवले खुल्ला सिमानाको फाईदा उठाउँदै भईरहेको तस्करी नियन्त्रण गर्नु मुख्य चुनौती भएपनि बालकदेखि युवा पुस्ता सम्म लागुऔषधमा फस्नु अर्को चुनौतीपुणर् समस्या देखिएकाले यसतर्फ प्रहरी प्रशासन थप गम्भीर बन्नुपर्नेमा जोड दिनुभयो ।
लुम्बिनी प्रदेश प्रहरी कार्यालयका प्रहरी नायब महानिरीक्षक (डिआईजी) टेक प्रसाद राइले कार्ययोजना बनाएर सिमा क्षेत्रबाट हुने अवैध ओसारपसार नियन्त्रणमा प्रहरी लागिपरेको बताउनुभयो ।
जिल्ला प्रहरी कार्यालयको परिसरमा निर्माण गरिएको चार वटा भवन निर्माण सम्पन्न गर्न चार करोड ३७ लाख लागेको प्रहरी नायब उपरीक्षक इन्जिनियर धु्रब अधिकारीले जानकारी दिनुभयो ।