भरतपुर । चितवनको खैरहनीका साढे चार सय जना विपन्न नागरिकको निःशुल्क स्वास्थ्य बिमा गरिएको छ । नगरपालिकाले ‘विपन्न नागरिक स्वास्थ्य बिमा कार्यक्रम’अन्तर्गत ४५८ विपन्न नगरवासीको निःशुल्क बिमा गरेको हो ।
आर्थिक अभावका कारण कुनै पनि नागरिक स्वास्थ्य उपचार सेवाबाट वञ्चित हुन नपरोस् भन्ने उद्देश्यले नगरभित्रका विपन्न नागरिकको परिवारको निःशुल्क स्वास्थ्य बिमा गरिएको नगरप्रमुख शशिकुमार खनियाँले बताउनुभयो । उहाका अनुसार विगत तीन वर्षभित्रमा यस कार्यक्रमबाट हालसम्म नगरपालिकाभित्रका करिब पन्ध्र सय नागरिक लाभान्वित भएका छन् । खासगरी, विपन्न नगरवासी नागरिकको स्वास्थ्यको रक्षा गर्नु नगरको दायित्व रहेकाले केही वर्षदेखि नगरपालिकाले विपन्न नागरिकको स्वास्थ्य बिमा थालिएको नगरप्रमुख खनियाँको भनाई छ ।
वडा कार्यालयले विपन्न परिवार पहिचान गरी सिफारिस गरेको आधारमा बिमा कार्यक्रममा समावेश गरिएको नगर उपप्रमुख कविता उप्रेतीले बताउनुभयो । वडाले गरेको सिफारिसलाई स्वास्थ्य शाखाबाट प्रत्येक परिवारको अनुगमन गरी लाभग्राही छनोट गरिएको छ ।
