फाल्गुन २६ । राष्ट्रिय प्रजातन्त्र पार्टी (राप्रपा) ले काठमाडौँ महानगरपालिकाबाट तोकिएको एक लाख रुपैयाँको जरिवाना बुझाएको छ । आइतबार राप्रपा पार्टीले पूर्वराजा ज्ञानेन्द्र शाहको स्वागतका क्रममा फोहोर भएको भन्दै काठमाडौँ महानगरपालिकाले उक्त जरिवाना तोकेको थियो। पार्टीले आज पत्र बुझेर जरिवाना तिरेको हो। पार्टी प्रवक्ता ज्ञानेन्द्र शाहीले महानगरको खातामा जरिवाना दाखिला गरेको जानकारी दिनुभएको छ ।
राप्रपाको र्यालीको क्रममा एयरपोर्ट, तिलगंगा गौशाला र अन्य सार्वजनिक स्थानहरूमा फोहोरको समस्यासमेत देखिएको थियो। यसका कारण काठमाडौँ महानगरपालिकाले फोहरमैला व्यवस्थापन ऐन, २०६८, काठमाडौँ महानगरपालिका वातावरण संरक्षण ऐन, २०७७ र आर्थिक ऐन, २०८१ बमोजिम राप्रपालाई एक लाख रुपैयाँको जरिवाना तोकेको थियो।
राप्रपाले उक्त रकम तिर्ने निर्णय गरेपछि अब पार्टीको गतिविधिहरू थप सावधानीपूर्वक सञ्चालन हुने बताइएको छ। पार्टीका नेताहरूले काठमाडौँ महानगरपालिकासँग सहकार्य गर्दै आगामी कार्यहरूमा फोहोर व्यवस्थापन र सार्वजनिक स्थानहरूको सरसफाइमा ध्यान दिने प्रतिबद्धता जनाएका छन्।
