काठमाडौं, यूके एजुकेशन फेयर २०२५ काठमाडौंमा भव्य रूपमा सम्पन्न भएको छ। University Admissions Networks (UAN) को आयोजनामा मे ३०, २०२५ का दिन पुतलीसडकस्थित कृषि विकास बैंकको पहिलो तल्लामा सम्पन्न भएको यस फेयरमा यूकेमा उच्च शिक्षा अध्ययन गर्न इच्छुक सयौँ विद्यार्थी र अभिभावकहरूको उल्लेखनीय उपस्थिति रहेको थियो।

फेयरमा यूकेका २० भन्दा बढी प्रतिष्ठित विश्वविद्यालयहरू र शैक्षिक संस्थाहरूको सहभागिता रहेको थियो। सहभागी विश्वविद्यालयहरूमध्ये Cardiff Metropolitan University, University for the Creative Arts, Regent College London, UWE Bristol, University of Chester, University of Greenwich, University of East London, The University of Law, Abertay University, University of Suffolk, Oxford International Education Group, तथा Study Group जस्ता संस्थाहरू प्रमुख थिए।

कार्यक्रममा सहभागी विश्वविद्यालयका प्रतिनिधिहरू—सुनिल रेग्मी (क्षेत्रीय प्रबन्धक, Malvern International), ईशा भूमि श्रेष्ठ (प्रतिनिधि, University for the Creative Arts), रोजिना थापा (इन्टरनेशनल रिक्रुटमेन्ट अफिसर, Oxford International Education Group), र अंकित ढकाल (बिजनेस डेभलपमेन्ट म्यानेजर, University of Law)—ले विद्यार्थीहरूलाई प्रत्यक्ष भेटघाट गर्दै अध्ययनका अवसर, पाठ्यक्रम छनोट, छात्रवृत्ति, आवेदन प्रक्रिया, तथा भिसा सम्बन्धी जानकारी दिएका थिए।

फेयरमा सहभागी विद्यार्थीहरूले प्रतिनिधिहरूसँग प्रत्यक्ष अन्तरक्रिया गर्ने मौका पाएका थिए जसले गर्दा उनीहरूले यूकेमा उच्च शिक्षा अध्ययनबारे विस्तृत जानकारी लिन सके। धेरै विद्यार्थीहरूले यस्तो कार्यक्रमले आफूलाई स्पष्ट मार्गदर्शन दिएको प्रतिक्रिया दिएका थिए।

कार्यक्रममा बोल्दै सुनिल रेग्मीले भने, “नेपाली विद्यार्थी र यूकेका विश्वविद्यालयबीचको दूरी घटाउन यस्ता मेला निकै महत्वपूर्ण छन्। विद्यार्थीहरूले जानकारीमूलक निर्णय गर्न यस्ता फेयर उपयोगी हुन्छन्।” त्यस्तै, रोजिना थापाले भनिन्, “विद्यार्थीहरूलाई यूकेसम्मको शैक्षिक यात्रामा आत्मविश्वासका साथ अघि बढ्न हामीले निरन्तर साथ दिन्छौं।”

फेयरको समापनमा आयोजक University Admissions Networks (UAN) ले सहभागी सबै विश्वविद्यालय प्रतिनिधि, विद्यार्थी तथा अभिभावकहरूलाई धन्यवाद दिंदै कार्यक्रमलाई सफल बनाइदिनुमा कृतज्ञता व्यक्त गरेको थियो। कार्यक्रमले यूकेमा अध्ययन गर्न चाहने नेपाली विद्यार्थीहरूका लागि नयाँ ढोका खोलिदिएको विश्वास लिइएको छ।