काठमाडौं, काठमाडौंस्थित थाइल्याण्ड दूतावासले शुक्रबार पत्रकार सम्मेलनको आयोजना गर्दै ‘जर्नी टु थाइल्याण्ड एण्ड टप थाइ ब्रान्ड्स २०२५’ नामक भव्य आगामी कार्यक्रमको आधिकारिक घोषणा गरेको छ। यो कार्यक्रम थाइल्याण्डको डिपार्टमेन्ट अफ इन्टरनेशनल ट्रेड प्रमोशन (DITP) सँगको सहकार्यमा आयोजना हुन लागेको हो।

दूतावास परिसरमा सम्पन्न पत्रकार सम्मेलनमा नेपालका लागि थाइल्याण्डका राजदूत महामहिम सुवापोङ सिरिसोर्नले कार्यक्रमका उद्देश्य र मुख्य आकर्षणबारे जानकारी दिएका थिए। उनले भने, “यो कार्यक्रम थाइल्याण्डको संस्कृति, नवप्रवर्तन र व्यापारिक उत्कृष्टताको उत्सव हो। हामी नेपाली जनतासम्म हाम्रो मौलिक भोजन, रंगीन प्रस्तुति, उत्कृष्ट उत्पादन र सिर्जनात्मक उद्योगको अनुभव पुर्‍याउन चाहन्छौं। यो सांस्कृतिक तथा आर्थिक दुवै क्षेत्रमा दुई देशबीचको सम्बन्धलाई अझ मजबुत पार्ने अवसर हुनेछ।”

राजदूत सिरिसोर्नले ‘जर्नी टु थाइल्याण्ड एण्ड टप थाइ ब्रान्ड्स २०२५’ मा थाइल्याण्डका विविध उत्पादन, पाककलाको अनुभव र सांस्कृतिक प्रस्तुति प्रदर्शित हुने बताउँदै, यसले थाइल्याण्डको समृद्ध परम्परा र आधुनिक उपलब्धिहरूलाई उजागर गर्ने बताए। DITP को सहकार्यले उच्चस्तरीय थाइ व्यवसायी र हस्तकला उत्पादकको सहभागिता सुनिश्चित हुने भएकाले यो कार्यक्रम व्यापारिक अवसर र सांस्कृतिक आदानप्रदान दुवैका लागि महत्वपूर्ण मञ्च हुने उनले उल्लेख गरे।

कार्यक्रमको घोषणापछि भएको प्रश्नोत्तर सत्रमा राजदूतले लाइभ कुकिङ शो, सांस्कृतिक प्रस्तुति तथा नेपाली आयातकर्ता र उद्यमीहरूका लागि व्यापारिक नेटवर्किङ जस्ता आगामी गतिविधिहरूबारे जानकारी दिएका थिए।