काठमाडौं । नेपालस्थित इजरायलका राजदूत श्मुलिक एरी बासले कुनै पनि राष्ट्रले नरसंहारमा संलग्न र आफ्नो विनाशमा कटिबद्ध आतंकवादी संगठनलाई सहन गर्न नहुने स्पष्ट गरेका छन् । उनले इजरायलको मुख्य उद्देश्य सबै अपहृतको मुक्तिको रहेको जनाउँदै नेपालका बिपिन जोशीलाई समेत हामासको कब्जाबाट मुक्त गराउन प्रतिबद्धता व्यक्त गरे ।
राजदूत बासका अनुसार, “इजरायलको उद्देश्य सबै अपहृतको उद्धार गर्नु र गाजालाई हामास आतंकवादीको नियन्त्रणबाट स्वतन्त्र गराउनु हो ।” उनले संयुक्त राष्ट्रसंघका पछिल्ला प्रस्तावमा इस्रायलविरुद्धको पूर्वाग्रह रहेको भन्दै आपत्ति जनाए । उक्त महासभा प्रस्तावले युद्धविराम मात्र माग गरेको तर हामासले कब्जा गरेका बन्धकको मुक्तिबारे मौन बसेको उल्लेख गर्दै उनले नेपालले समेत आफ्नै नागरिक बिपिन जोशीको मुक्तिको पक्षमा आवाज नउठाएकोमा खेद प्रकट गरे ।
उनले हामासले गाजामा राहतसम्बन्धी झुटो प्रचार गरेको तर इजरायलले पानी, खानेकुरा र बिजुली आपूर्ति गरिरहेको प्रस्ट पारे । “हामाससँग अझै हजारौँ शस्त्रधारी आतङ्ककारी छन् र उनीहरूले अक्टोबर ७ को नरसंहार दोहोर्याउने धम्की दिइरहेका छन्,” राजदूत बासले भने ।
यसैबीच, इजरायल दूतावासकी उपमिशन प्रमुख जनान बेबारले पत्रकार सम्मेलनमार्फत गाजाको वास्तविकता र इजरायलको दृष्टिकोण प्रस्तुत गरिन् । उनले भनिन्, “विश्व समुदायले हामासलाई खुसी पार्ने निर्णय नगरी तथ्यमा आधारित भएर मात्र कदम चाल्नुपर्छ ।”
उनले हामासका अपराधलाई बेवास्ता गरी इजरायल र यहूदी समुदायलाई दोषारोपण गर्ने प्रवृत्तिको निन्दा गर्दै अन्तर्राष्ट्रिय समाजलाई सत्य बुझ्न आग्रह गरिन् ।
