काठमाडौं, अक्टोबर ३०, २०२५ —इजरायलमा अक्टोबर ७, २०२३ मा हमासद्वारा गराइएको आतंकवादी हमलाका पीडितहरूको सम्झनामा आज काठमाडौंमा एक श्रद्धाञ्जली कार्यक्रम आयोजना गरिएको छ। यो दिनलाई आधुनिक इतिहासका सबैभन्दा कालो दिनहरूमध्ये एक मानिन्छ। उक्त हमलामा १,२०० भन्दा बढी निर्दोष इजरायली र विदेशी नागरिकहरूको हत्या गरिएको थियो, जसमा कृषि तालिम कार्यक्रममा सहभागी ११ जना नेपाली विद्यार्थीहरू पनि परेका थिए।

तीमध्ये बिपिन जोशीलाई जिवितै अपहरण गरिएको थियो। उनको अवस्था करिब दुई वर्षसम्म अज्ञात रह्यो। हालसालै उनलाई बन्दी अवस्थामै हत्या गरिएको पुष्टि भएको हो। उनको शव पूर्व अमेरिकी राष्ट्रपति डोनाल्ड ट्रम्पको पहलमा भएको सहकार्यपछि कञ्चनपुर, नेपाल ल्याइएको थियो।

कार्यक्रममा वरिष्ठ सरकारी अधिकारी, कूटनीतिक समुदायका सदस्य, सञ्चारकर्मी र विशिष्ट अतिथिहरू उपस्थित थिए। सहभागीहरूले पीडितहरूप्रति श्रद्धाञ्जली अर्पण गर्दै इजरायल र नेपालका जनतासँग ऐक्यबद्धता व्यक्त गरे।

कार्यक्रमको सुरुवातमा हमास र अन्य आतंकी समूहहरूले गरेको अत्याचारहरू देखाउने भिडियो सामग्री प्रदर्शन गरिएको थियो, जसमा हत्या, अपहरण र युद्धअपराधका भयावह दृश्यहरू समावेश थिए। त्यसपछि ममबत्ती बालेर श्रद्धाञ्जली अर्पण गरिएको र एक मिनेट मौनधारण गरिएको थियो।

इजरायल दूतावासकी उप–मिशन प्रमुख जनन बेबारले उक्त घटनाको मानवीय मूल्य र पीडाको बारेमा भावनात्मक प्रस्तुति दिइन्। उनले बिपिन जोशीको अपहरण र हत्या, डिन्ना रिपोर्टमा उल्लिखित यौन हिंसा र यातनाका घटनाहरू र नोभा म्युजिक फेस्टिभलमा भएको नरसंहारका विषयमा जानकारी दिइन्। उनले बालबालिका, वृद्धवृद्धा र सम्पूर्ण बस्तीलाई लक्षित गरिएका आक्रमणहरूको उल्लेख गर्दै घटनाबाट बाँचेकाहरू र परिवारहरूले भोगिरहेको पीडाबारे चर्चा गरिन्।

दिपेशराज बिष्टका परिवारका प्रतिनिधि बसन्तराज बिष्टले आफ्ना अनुभवहरू साझा गर्दै श्रद्धाञ्जली व्यक्त गरे भने हमलाबाट बाँच्न सफल नेपाली नागरिक हिमाञ्चल कट्टेलले आफ्नो अनुभव सुनाए। त्यस्तै अर्जुन हार्दास, अमेरिकन यहूदी समिति (AJC) भारतका प्रतिनिधि, ले आतंकवादविरुद्ध विश्व ऐक्यबद्ध हुनुपर्ने सन्देश दिए।

इजरायलका राजदूत एम्बेसेडर शमुलिक एरी बासले भने,

“यो निर्दयी आक्रमणले हाम्रो जनताको नियतिलाई सधैंका लागि जोडिदिएको छ। इजरायल सरकार पीडित परिवारहरूसँग सधैं रहन्छ।”

कार्यक्रमका प्रमुख अतिथि सर्वोच्च अदालतका न्यायाधीश सुनीलकुमार पोखरेलले भने,

“शान्तिको विकल्प छैन। हालको शान्ति सम्झौताले क्षेत्रीय स्थायित्व र पीडितहरूका लागि न्याय ल्याओस् भन्ने मेरो अपेक्षा छ।”

कार्यक्रममा इजरायली फोटोग्राफर जिवी कोहेनसहितका कलाकारहरूले तयार पारेका तस्बिरहरूको प्रदर्शनी पनि गरिएको थियो, जसले उक्त घटनाबाट उत्पन्न मानवीय पीडालाई शक्तिशाली दृश्यमार्फत् प्रस्तुत गरेको थियो।

कार्यक्रमले स्मरण, करुणा र ऐक्यबद्धताको सन्देश दिएर समापन भयो, र विश्वले सबै किसिमका आतंकवादविरुद्ध एकजुट हुनुपर्ने आवश्यकता पुनः दोहोर्‍यायो।