काठमाडौं, अक्टोबर ३० – जापान सरकारको सहयोगमा प्राप्त १२ वटा पुनः प्रयोग गरिएको दमकल आज नेपालका दुई गैर–सरकारी संस्थालाई हस्तान्तरण गरिएको छ।
यी दमकलहरू निकट भविष्यमा मधेश, बागमती, गण्डकी, कोशी र लुम्बिनी प्रदेशका १२ वटा नगरपालिकामा परिचालन गरिने भएका छन्।
जापान दूतावासले आज जारी गरेको विज्ञप्तिअनुसार, जापानबाट पुनः प्रयोग गरिएका दमकलहरू उपलब्ध गराउने परियोजना भोलिन्टियर कोर्प्स नेपाल (VCN), जसको नेतृत्व दीपक चापागाईंले गरेका छन्, र युनाइटेड मिसन टु नेपाल (UMN), जसको नेतृत्व धना लामाले गरेका छन्, मार्फत कार्यान्वयन गरिएको हो।
यस परियोजनाका लागि जापान सरकारले VCN लाई २,८२,६१४ अमेरिकी डलर र UMN लाई २,५९,०३५ अमेरिकी डलर अनुदान प्रदान गरेको दूतावासले जनाएको छ।
कार्यक्रमको अवसरमा जापानका राजदूत माएदा तोरुले परियोजनासँग सम्बन्धित सबैलाई बधाई दिएका छन्। उनले दमकल हस्तान्तरण परियोजना सफलतापूर्वक सम्पन्न गर्न सहयोग गर्ने सबैप्रति आभार व्यक्त गर्दै, यी सवारी साधनहरूले नेपालका स्थानीय समुदायमा आकस्मिक सेवा क्षमतामा सुधार ल्याउने विश्वास व्यक्त गरे।
जापान दूतावासका अनुसार, यी परियोजनाहरूले १२ वटा नगरपालिका र तिनका वरिपरिका क्षेत्रमा आगलागीको जोखिम घटाउने र समुदायको सुरक्षामा योगदान पुर्याउने छन्। साथै, यस सहयोगले जापान र नेपालबीचको मैत्री सम्बन्धलाई अझ गहिरो बनाउने विश्वास पनि व्यक्त गरिएको छ।
सन् १९९१ मा स्थापना गरिएको ग्रासरुट्स ह्युमन सेक्युरिटी परियोजना (GGP) अन्तर्गत जापानले नेपालमा हालसम्म २०० भन्दा बढी सामुदायिक विकास परियोजनाहरू कार्यान्वयन गरेको छ।
