काठमाडौं, डिसेम्बर ३, २०२५ – नेपालका लागि पाकिस्तानका राजदूत एच.इ. अब्रार एच. हाश्मीले ३० नोभेम्बरदेखि २ डिसेम्बरसम्म लुम्बिनी र भरतपुरको सरकारी भ्रमण सम्पन्न गर्दै दुई देशबीचको सांस्कृतिक, धार्मिक धरोहर तथा स्वास्थ्य क्षेत्र सहकार्यलाई थप मजबुत बनाउने उद्देश्य प्रस्ट पारे।
लुम्बिनी भ्रमणका क्रममा राजदूत हाश्मीले भगवान बुद्धको जन्मस्थलमा श्रद्धाञ्जलि अर्पण गर्दै लुम्बिनी विकास कोष तथा लुम्बिनीका कार्यवाहक नगरप्रमुखसँग भेटवार्ता गरे। छलफलमा पाकिस्तान–नेपालबीचको सांस्कृतिक सम्बन्ध, धरोहर संरक्षण र नागरिकस्तरको सहकार्य मजबुत पार्ने विषयमा केन्द्रीत रह्यो।
भरतपुरमा, राजदूतले भरतपुर नेत्र अस्पताल (BEH) लाई कागजरहित डिजिटल प्रणाली स्थापना गर्न आवश्यक सहयोगस्वरूप एक चेक हस्तान्तरण गरे। पाकिस्तानका जनताबाट प्रदान गरिएको यो सहयोगले अस्पताललाई इलेक्ट्रोनिक हेल्थ रेकर्ड (EHR) प्रणालीमार्फत पूर्ण डिजिटल वातावरणमा रुपान्तरण गर्न सहयोग पुर्याउनेछ।
राजदूत हाश्मीले सन् १९८७ मा पाकिस्तानको BCCI फाउन्डेशनको आर्थिक सहयोगमा निर्माण भएको भरतपुर नेत्र अस्पतालसँग पाकिस्तानको दीर्घ साझेदारीको स्मरण गर्दै पछिल्ला वर्षहरूमा अस्पतालमा फार्मेसी, अपरेसन थियटर, आउटरीच एम्बुलेन्स तथा आँखा उपचारसम्बन्धी प्राविधिक तथा शैक्षिक आदान–प्रदानमार्फत निरन्तर सहयोग दिइआएको उल्लेख गरे।
समारोहमा बोल्दै राजदूतले स्वास्थ्य क्षेत्रको सहकार्य पाकिस्तान–नेपाल सम्बन्धको महत्वपूर्ण स्तम्भ भएको भन्दै जनकेन्द्रित विकास कार्यक्रमले दुई देश बीचको मैत्रीपूर्ण सम्बन्ध थप मजबुत बनाइरहेको बताए।
अस्पताल व्यवस्थापन समिति अध्यक्ष जयाराम श्रेष्ठ र प्रमुख चिकित्सा अधिकृत डा. पुष्पा गिरीले नेपालका स्वास्थ्य सेवाको गुणस्तर अभिवृद्धिमा पाकिस्तान जनताले वर्षौंदेखि पुर्याउँदै आएको योगदानप्रति आभार व्यक्त गरे।
राजदूत हाश्मीको उपस्थितिमा भरतपुर गार्डेन होटलमा आयोजित डिनर कार्यक्रममा अस्पताल व्यवस्थापन, चिकित्सकहरु, स्थानीय प्रशासन, व्यवसायी, समुदाय अगुवा तथा पाकिस्तानी संस्थाका पूर्वविद्यार्थीहरू सहभागी थिए।
यसै क्रममा, राजदूत हाश्मीले चितवनस्थित कलेज अफ मेडिकल साइन्सको अवलोकन गर्दै विद्यार्थी तथा संकाय सदस्यहरूसँग अन्तरक्रिया गरे, जहाँ उनले संस्थाले प्रदान गर्दै आएको गुणस्तरीय मेडिकल र TVET शिक्षाको प्रशंसा गरे।
