काठमाडौं, पुस २१— ललितपुरको सानो गाउँ, सिद्धिपुरस्थित रोयल बास्केटबल एकेडेमीमा सम्पन्न दोस्रो इन्टर–कलेज गर्ल्स बास्केटबल टुर्नामेन्ट २०२५ आज भव्य रूपमा समापन भएको छ। प्रतिष्पर्धात्मक अन्तिम खेलमा गोल्डेनगेट इन्टरनेशनल कलेजले उत्कृष्ट प्रदर्शन गर्दै उपाधि जित्न सफल भएको छ।
यससँगै जेभियर इन्टरनेशनल कलेजले पहिलो रनर–अप तथा ल्यान्डमार्क एकेडेमीले दोस्रो रनर–अप पदक प्राप्त गरेका छन्।
यो प्रतियोगिता प्रोफेशनल एजुकेशन कन्सल्टेन्सी (PEC) र अष्ट्रेलियन क्याथोलिक युनिभर्सिटी (ACU) को सहआयोजनामा सम्पन्न भएको हो। ३२ वर्षभन्दा बढी समयदेखि शिक्षा क्षेत्रमा सेवा प्रदान गर्दै आएको PEC पछिल्लो करिब दुई दशकदेखि महिला खेलकुद प्रवर्द्धनमा निरन्तर क्रियाशील रहँदै आएको छ। क्रिकेट र बास्केटबलमा युवतीहरूको सहभागिता विस्तार गर्न यस संस्थाले महत्वपूर्ण योगदान गर्दै आएको छ।
नेपाल महिला राष्ट्रिय क्रिकेट टीमकी कप्तान इन्दु वर्मा हाल PEC की ब्रान्ड एम्ब्यासडर पनि रहेकी छिन्, जसले संस्थाको महिला खेलाडीप्रतिको प्रतिबद्धता झल्काउँछ।
समापन समारोहमा अष्ट्रेलियन क्याथोलिक युनिभर्सिटीकी प्रतिनिधि अनुष्का श्रेष्ठ प्रमुख अतिथि रहनु भएको थियो। उनले खेलकुदले नेतृत्व क्षमता, आत्मविश्वास तथा अनुशासन विकासमा महत्वपूर्ण भूमिका खेल्ने उल्लेख गर्दै महिलालाई समान अवसरसहित बलियो प्लेटफर्म उपलब्ध गराउनुपर्नेमा जोड दिइन्।
त्यस्तै, प्रोफेशनल एजुकेशन कन्सल्टेन्सीका सेल्स एण्ड मार्केटिङ डिरेक्टर राजु सिंहले संस्था शिक्षासँगै सामाजिक दायित्वमा पनि समर्पित रहेको बताउँदै महिला खेलकुद प्रवर्द्धनका गतिविधि निरन्तर जारी रहने बताएका छन्।
यस वर्षको संस्करणमा ८ कलेजका महिला टोलीहरूको सहभागिता रहेको थियो, जुन हालसम्मकै सबैभन्दा धेरै हो। प्रतियोगितामा सहभागी खेलाडीलाई नेपाल महिला राष्ट्रिय बास्केटबल टोलीका खेलाडीहरूको सक्रिय उपस्थितिले थप प्रेरित बनाएको आयोजकको भनाइ छ।
प्रतियोगिता मङ्सिर १५ देखि मङ्सिर २१ गतेसम्म सञ्चालन भएको थियो। आयोजक संस्थाहरूले आगामी वर्षहरूमा निरन्तर रूपमा यो प्रतियोगिता आयोजना गर्दै महिला खेलकुद, नेतृत्व विकास र सामाजिक सशक्तीकरणमा योगदान दिने योजना रहेको जानकारी गराएका छन्।
