काठमाडौं, विद्यार्थीहरूलाई युनाइटेड किङ्डममा उच्च शिक्षा अध्ययनका अवसरबारे प्रत्यक्ष र प्रामाणिक जानकारी प्रदान गर्ने उद्देश्यका साथ बिज एजुकेसनद्वारा आयोजित ‘ग्रान्ड युके फेस्ट – बिज टु ब्रिटेन’ गट्ठाघरमा सफलतापूर्वक सञ्चालन भइरहेको छ। कार्यक्रमले युके अध्ययनप्रति चासो राख्ने विद्यार्थी र अभिभावकहरूको उल्लेखनीय सहभागिता आकर्षित गरेको छ।
‘जिज्ञासु भएर प्रवेश गर्नुहोस्, सन्तुष्ट भएर बाहिरिनुहोस्’ भन्ने मूल नारासहित आयोजना गरिएको यस शैक्षिक महोत्सवले विद्यार्थीहरूलाई युकेका विश्वविद्यालय, पाठ्यक्रम, छात्रवृत्ति, भर्ना प्रक्रिया तथा करिअर–केन्द्रित शैक्षिक मार्गबारे प्रत्यक्ष जानकारी उपलब्ध गराएको छ। कार्यक्रममा सहभागी विद्यार्थीहरूले आधिकारिक विश्वविद्यालय प्रतिनिधिहरूसँग प्रत्यक्ष संवाद गर्ने अवसर पाएका छन्।
कार्यक्रमका मुख्य आकर्षणका रूपमा ग्लोबल युनिभर्सिटी सिस्टम्सकी अन्तर्राष्ट्रिय भर्ना कार्यकारी निर्देशक सुश्री उल टाङ प्लाउम्यान तथा आर्डेन युनिभर्सिटीकी वरिष्ठ व्यवसाय विकास प्रबन्धक सुश्री नीलम शर्मा को उपस्थिति रहेको छ। उहाँहरूले युके शिक्षाको वर्तमान अवस्था, अन्तर्राष्ट्रिय विद्यार्थीका लागि उपलब्ध अवसर तथा अध्ययनपछिको करिअर सम्भावनाबारे विस्तृत जानकारी दिनुभएको छ।
कार्यक्रममा बोल्दै सुश्री उल टाङ प्लाउम्यान ले आर्डेन युनिभर्सिटी (युके) र यसको जर्मनीको बर्लिन क्याम्पस बारे जानकारी साझा गर्नुभयो। उहाँका अनुसार आर्डेन युनिभर्सिटीमा व्यवसाय व्यवस्थापन, सूचना प्रविधि, कम्प्युटिङ, डाटा एनालिटिक्स, स्वास्थ्य तथा सामाजिक सेवा र एमबीए जस्ता पाठ्यक्रमहरू अन्तर्राष्ट्रिय विद्यार्थीहरूबीच अत्यन्त लोकप्रिय रहेका छन्। साथै, बर्लिन क्याम्पसले बहुसांस्कृतिक वातावरण, आधुनिक शैक्षिक संरचना र युरोपमा करिअर विस्तारका अवसर प्रदान गर्ने उहाँको भनाइ थियो।
उहाँले क्याम्पस सुविधाबारे जानकारी दिँदै डिजिटल शिक्षण प्रणाली, लचिलो अध्ययन मोडेल, विद्यार्थी सहयोग सेवा तथा उद्योगसँग समन्वय गरिएका पाठ्यक्रमहरू आर्डेन युनिभर्सिटीको विशेषता रहेको उल्लेख गर्नुभयो।
त्यसैगरी, नीलम शर्मा ले भर्ना प्रक्रिया, प्रवेश आवश्यकताहरू, अध्ययन सत्रहरू र छात्रवृत्ति अवसरबारे स्पष्ट जानकारी दिनुभयो। उहाँले विद्यार्थीहरूलाई आफ्नो शैक्षिक पृष्ठभूमि र दीर्घकालीन करिअर लक्ष्यअनुसार पाठ्यक्रम छनोट गर्न सुझाव दिनुभयो।
यस कार्यक्रम बिज एजुकेसनद्वारा सञ्चालन भइरहेको शैक्षिक सचेतना अभियान अन्तर्गत आयोजना गरिएको हो, जसको नेतृत्व हरि कार्की ले गर्नुभएको छ। अभियानको मुख्य उद्देश्य विद्यार्थी र अभिभावकहरूलाई वैदेशिक अध्ययनसम्बन्धी सही सूचना प्रदान गर्दै सचेत निर्णय लिन प्रेरित गर्नु रहेको आयोजकले जनाएका छन्।
बिज एजुकेसनको सचेतना अभियानले पारदर्शी परामर्श, आधिकारिक विश्वविद्यालयसँग प्रत्यक्ष पहुँच र विद्यार्थी–केन्द्रित मार्गदर्शनलाई प्राथमिकता दिएको छ। यस प्रकारका कार्यक्रममार्फत वैदेशिक अध्ययनसम्बन्धी भ्रम हटाउँदै विश्वसनीय जानकारी प्रवाह गर्ने लक्ष्य लिइएको आयोजकको भनाइ छ।
कार्यक्रममा सहभागी विद्यार्थीहरूले युकेका पाठ्यक्रम, छात्रवृत्ति, भर्ना मार्गदर्शन र करिअर–केन्द्रित शैक्षिक अवसरबारे प्रत्यक्ष परामर्श प्राप्त गरेका छन्। ‘ग्रान्ड युके फेस्ट – बिज टु ब्रिटेन’ ले नेपालका विद्यार्थीहरूका लागि युके तथा युरोपेली शिक्षाको ढोका खोल्न महत्वपूर्ण भूमिका खेलेको सहभागीहरूको प्रतिक्रिया रहेको छ।
