नवलपरासी/ २४ फागुन
प्रतिनिधिसभा निर्वाचनको मत परिणाम सार्वजनिक भए लगतै नवलपरासी-२ का कांग्रेस उम्मेदवार भिम बहादुर थापा क्षेत्री (भरत) ले मतदाताप्रति आभार व्यक्त गरेका छन ।
थापाले वक्तव्य मार्फ़त लोकतन्त्रको महान पर्वका रूपमा सम्पन्न भएको निर्वाचनमा आफ्नो अमूल्य मताधिकार प्रयोग गर्ने सम्पूर्ण मतदातालाई हार्दिक धन्यवाद दीदै लोकतान्त्रिक प्रक्रियाप्रति सम्मान जनाएका छन् । उनले जनताको जनमत नै लोकतन्त्रको सबैभन्दा ठूलो शक्ति भएको उल्लेख गर्दै प्राप्त परिणामलाई सबैले खुलेर सम्मान गर्नुपर्ने बताएका छन्।
“जित–हार लोकतान्त्रिक यात्राको स्वाभाविक पाटो मात्र हो, तर जनताको निर्णय सधैं सर्वोपरि हुन्छ,” उनले भनेका छन्।
थापाले निर्वाचन अभियानका क्रममा दिन–रात खटिने पार्टीका नेता–कार्यकर्ता, समर्थक तथा शुभेच्छुकहरूलाई पनि धन्यवाद दिएका छन्। उनीहरूकै मिहिनेत, समर्पण र विश्वासका कारण चुनावी यात्रा सम्भव भएको उनले उल्लेख गरेका छन्।
यसैगरी चुनावी परिणामपछि एकअर्कालाई दोषारोपण गर्नेभन्दा पनि आत्ममूल्याङ्कन गर्दै अझ सशक्त रूपमा अघि बढ्नुपर्नेमा उनले जोड दिएका छन्।
थापाले अब बन्ने सरकारलाई सफल बनाउन सबैले सकारात्मक साथ र सहयोग गर्नुपर्ने आवश्यकता पनि औंल्याएका छन्।
नवलपरासीलाई अझ समृद्ध, सभ्य र विकसित बनाउने साझा अभियानमा सबै मिलेर अघि बढ्नुपर्ने बताउँदै उनले एकता र सहकार्यबाट मात्रै जिल्लाको उज्यालो भविष्य सम्भव हुने विश्वास व्यक्त गरेका छन्।
वक्तव्यमा देश र क्षेत्रको विकासका लागि सबैले हातेमालो गरेर अघि बढ्न आग्रहका साथ अन्त्यमा “जय नेपाल” सम्बोधन गरेका छन्।
