नवलपरासी । लुम्विनी प्रदेश सभा सदस्य खडक बस्नेतले सहकारी संस्थाहरुले स्थानिय बिद्यालयहरुसंग सहकार्य गर्दै दक्ष जनशक्ति उत्पादनतिर लाग्नुपर्ने बताएका छन् । बुधवार सुनवल १२ भुमही स्थित सिद्धार्थ बहुउदेश्यीय सहकारी संस्था लि.को २५ औ बार्षिकोत्सव तथा रजत जयन्ती समारोहलाई सम्बोधन गर्दै प्रदेश सभा सदस्य बस्नेतले संस्थाले समयको ब्यवस्थापन गरी अगाडी बढनुपर्ने बताएका हुन् । लुम्बिनी प्रदेशमा कृषि तथा सहकारी मन्त्रालय छुट्टै गठन हुने भएकोले त्यँहाबाट सहकारीहरुको नियमन गर्ने उनले जानकारी दिए ।
स्वर्गीय नित्यानन्द पोखरेलको नेतृत्वमा २०५४ साल माघ १८ गते स्थापना भएको दिनलाई आधार मानेर रजतजयन्ती महोत्सव मनाएको संस्थाका अध्यक्ष यमलाल पाण्डेयले जानकारी दिए । रजतजयन्तीको अवसरमा सहकारीले माघ १६ गते सहकारी शिक्षा शिविर र माघ १७ गते आर्थिक बिकासमा सहकारीताको भुमिका बिषयक माबि स्तरीय वक्तृत्वकला प्रतियोगिता र महिला नेतृत्व बिकास तालिम आयोजना गरेको थियो ।
कार्यक्रममा सहकारीका संस्थापक अध्यक्ष स्व. नित्यानन्द पोखरेल सहित तीन जनालाई मरणोपरान्त सम्मान गरिएको थियो । यस्तै सहकारीको स्थापनाकालदेखि हालसम्मका सञ्चालक समिति तथा विभिन्न उपसमितिमा रहेर योगदान गरेका सदस्यहरु, स् कर्मचारीहरुलाई सम्मान तथा वक्तृत्वकला प्रतियोगिताका विजयीलाई पुरस्कार वितरण गरिएको थियो । कार्यक्रममा राष्ट्रिय लोक दोहोरी गायक खुमन अधिकारी, लोकदोहोरी गायिका रमिला न्यौपाने, प्रसिद्ध डान्सर अभिषेक खड्का लगायत स्थानीय कलाकारहरुको बेजोड प्रस्तुति रहेको थियो । २ हजार ३७ जना शेयर सदस्यको रहेको यस सहकारीको कुल शेयर पुजी ४ करोड ५० लाख रहेको अध्यक्ष पाण्डेयले जानकारी दिए ।
