रुपन्देही । रुपन्देहीमा भएका विभिन्न दुर्घटनामा २ जनाको ज्यान गएको छ । मोटरसाइकल र स्कुटर दुर्घटना हुँदा सोमबार दिउँसो दुई जनाको मृत्यु भएको हो । राजमार्ग सुरक्षा तथा ट्राफिक ब्यवस्थापन कार्यालय लुम्बिनी प्रदेशको कार्यालय बुटवलले दिएको जानकारीअनुसार शुद्धोधन गाउँपालिका र सैनामैनामा नगरपालिकामा भएको दुर्घटनामा दुई युवाको ज्यान गएको हो ।
रुपन्देही जिल्लाको शुद्धोधन गाउँपालिका-१ मा लु ५८ प ९७६ नम्बरको मोटरसाइकल आफैं अनियन्त्रित भई सडक छेउको विद्युत पोलमा ठोक्किएर चालक २५ वर्षीय सागर कुमालको मृत्यु भएको हो । सैनामैना-४ घर भएका उनी दुर्घटनामा परेपछि उद्दार गरी बुटवलस्थित लुम्बिनी प्रादेशिक अस्पतालमा ल्याएकोमा चिकित्सकले मृत घोषणा गरेका हुन्
यसैगरी पूव-पश्चिम राजमार्ग अन्तर्गत सैनामैना-११ फयरलाइनमा बुटवलतर्फ आउँदै गरेको स्कुटरले सोही दिशामा हिँडिरहेको सब्जी बोक्ने ठेलालाई ठक्कर दिँदा ३६ वर्षीय विशाल कार्कीको मृत्यु भएको हो । कपिलवस्तुको बाणगँगा नगरापलिका-१ घर भएका उनको दुर्घटनापछि उपचारको क्रममा लुम्बिनी प्रादेशिक अस्पतालमा बुटवलमा मृत्यु भएको हो ।
उनीसँगै पछाडि सवार सोही ठाउँका ३२ वर्षीय शैलेन्द्र पाण्डेको टाउकोमा गम्भीर चोट लागेको र अवस्था चिन्ताजनक रहेको प्रहरीले जनाएको छ । ठेला गुडाइरहेका व्यक्तिलाई भने सामान्य चोटपटक मात्रै लागेको प्रहरीले जनाएको छ ।
