सुनवल । सबै खाले मानविय विभेदका विरुद्ध मेचि-महाकाली साइकल यात्रामा निस्केका तीन पत्रकार महिलालाई नेपाल पत्रकार महासंघ नवलपरासी शाखाले आज बिहीबार सुनवलमा स्वागत सहित सम्मान गरेको छ । विभेद विरुद्ध बनेका कानुन कार्यान्वयन सहित सबैखाले भेदभावका बारेमा जागरण जगाउने उद्देश्यले पत्रकार महिलाहरुले बैशाख ६ गतेबाट पश्चिम महाकालीको गड्डा चौकीबाट साइकल यात्रा सुरु गरेका हुन् । साइकलयात्रामा नवलपरासीकी इन्दिरा विश्वकर्मा, बुटवलकी रिता बुढाथोकी र अर्घाखाँचीकी संगिता नेपाली सहभागी छन् ।
पत्रकार महासंघले आयोजना गरेको स्वागत एंव सम्मान कार्यक्रममा बोल्दै पत्रकार बुढाथोकीले पत्रकारिता गर्ने क्रममा समाजमा रहेको विभेद विकराल देखेकाले त्यसलाई जागरणकै रुपमा अघि बढाउनु पर्ने महशुस गरेर यात्रा आरम्भ गरेको बताउनुभयो ।
यात्राका क्रममा सर्वसाधारण मार्फत थुप्रै विभेदका घटनाका बारेमा जानकारी पाएकाले त्यसलाई प्रतिवेदनका रुपमा तयार पारेर सरकारलाई बुझाउने उनीहरुले बताएका छन् ।
साइकलयात्रा अबको करिब एक हप्तापछि पूर्वको झापामा पुगेर समापन गरिने टोलीले जानकारी दिएको छ ।
