पाल्पा । काफल टिप्न जंगल गएका एक किशोरको काफलको रुखबाट लडेर मृत्यु भएको छ । रैनादेवी छहरा गाउँपालिका-३, भुवनपोखरी छचुवाका मंगल कुमालको छोरा १८ वर्षीय सूर्य कुमालको मृत्यु भएको जिल्ला प्रहरी कार्यालय पाल्पाका सूचना अधिकारी वीरेन्द्र थापाले जानकारी दिए ।
आफ्नै घर नजिकको जंगलमा काफल टिप्न गएका कुमाल रुखबाट खसेर घाइते भएको र उपचारका लागि तानसेनस्थित युनाइटेड मिसन अस्पतालमा ल्याइएको थियो ।प्रहरीका अनुसार उपचारका क्रममा चिकित्सकले मृत घोषणा गरेका हुन् । घटनाका सम्बन्धमा थप अनुसन्धान अघि बढेको प्रहरीले जनाएको छ ।
