नवलपरासी, पुष ७ ।
पश्चिम नवलपरासीको सुनवल नगरपालिका वडा नं. १ सोमनाथ स्थित व्यवसायिक सटरहरुमा बुधबार राती आगलागी भएको छ । लज्जावती कन्ट्रक्सनले सञ्चालन गरेको सटरमा राति करिब १ बजे आगलागी भएको इलाका प्रहरी कार्यालय सुनवलका प्रमुख प्रहरी निरीक्षक विष्णुप्रसाद पौडेलले बताउनु भएको छ । आगलागीबाट ६ वटा मोटर ग्यारेज, टायर पसल, ब्याट्री पसल, मोटर पार्टस, होटल, गोदामहरु जलेर पूणर् क्षति भएका छन् । राती १ बजेको समयमा सटरहरुमा आगलागी हुँदा समयमै आगो निभाउन नसकिएपछि आगोले ठुलो रुप लिएको हो । सटरहरुमा आगलागी भएपछि रामग्राम, बर्दघाट नगरपालिकाको दमकल, नेपाल तथा शसस्त्र प्रहरी, र स्थानियहरुको प्रयासले राती नै आगो नियन्त्रणमा लिइएको थियो । आगोले मानविय क्षति भने हुन पाएन । आगलागीको कारण एकिन नभएको र अनुसन्धान भइरहेको प्रहरीले जनाएको छ । आगलागी हुँदा करोडौ रुपैयाको क्षति भएको अनुमान गरिएपनि यकिन क्षतिको विवरण भने आउन बाकी रहेको जिल्ला प्रहरी कार्यालय पश्चिम नवलपरासीले जनाएको छ ।
