केशव पराजुली,नवलपरासी । पश्चिम नवलपरासीका विभिन्न भारतीय नाकाबाट पछिल्लो समयमा व्यापक रुपमा तस्करी हुने गरेको पाइएको छ । सीमा क्षेत्रबाट चिनी, चामल, गहुँ तस्करी हुने गरेको हो । प्रत्येक दिन ३ देखि ४ ट्रक जिल्लाका विभिन्न नाकाबाट तस्करी हुँदा प्रहरीले कुनै वास्ता गरेको पाइँदैन । पश्चिम नवलपरासीको सुस्ता गाउँपालिका ५ को नथई नगरबाट मोटरसाइकल र पीकपबाट दिनहँु चिनीलगायतका सामान आउने गरेको स्थानीयको भनाई रहेको छ । त्यस्तै प्रतापुर गाउँ पालिका ५ को धर्मौली, सरावल गाउँपालिकाको भुजहवाबाट समेत दिनहुँ तस्करी हुने गरेको छ । जिल्लाबाट हुने तस्करीमा प्रहरीको संलग्नता रहेको बताइन्छ ।
नवलपरासीका विभिन्न सीमावर्ती नाकाबाट दैनिकजसो भन्सार छलेर भित्र्याइने चिनीका कारण नेपाली उद्योगहरु धरासायी बन्ने अवस्थामा पुगेको जिल्लाका उद्योगीहरुले गुनासो गरेका छन् । जिल्लामा तीन ठूला चिनी उद्योग छन् । अहिले बाग्मती, इन्दिरा र लुम्बिनी चिनी उद्योगहरुले उखु क्रसिङ गरेर चिनी उत्पादन गरिरहेका छन् । चिनी उत्पादन भए पनि भारतीय चिनीका कारण बजारमा चिनीको भाउ पाउन समस्या भएको उद्योगहरुले बताएका छन् ।
जिल्लाको नथई नगर, धर्मौली, भूजहवा, झोलनीपुर, बसैयालगायतका सीमावर्ती नाकाबाट दैनिकजसो ३ देखि ४ ट्रक चिनी तस्करी गरी नेपाल भित्र्याइँदा त्यसको प्रत्यक्ष असर उद्योगमा परेको उद्योगीहरुले बताएका छन् । दिनहुँजसो नेपाल प्रहरी र सशस्त्र प्रहरीले पिकअप भेनबाट ल्याइएका चिनी बरामद गरेको दाबी गर्दै आएको भए पनि तस्करी भने रोकिएको छैन । ठूलो परिणामको चिनी बरामद गरेको भने पाइएको छैन । तथ्यांक हेर्ने हो भने गत साउनदेखि मंसिर मसान्तसम्म ९४६ क्वीण्टल चिनी बरामद गरेको जनाएको छ ।
जसअनुसार भन्सार र सशस्त्र प्रहरीको टोलीले ४५१ क्वीण्टल , नेपाल प्रहरीले ४९३ क्वीण्टल चिनी बरामद गरेर भन्सार बुझाएको महेशपुर भन्सार कार्यालयका प्रमुख कणर्विर गैरले जानकारी दिएका छन् । भारतले चिनी निर्यात बन्द गरेको छ । निर्यात बन्द गरेका कारण पनि जिल्लामा चिनीको तस्करी बढेको गैरेको भनाई छ । प्रहरीले चिनी पक्राउ गरेको जनाए पनि अन्य सामान भने पक्राउ गरेको पाइँदैन । चिनी रातको समयमा मात्र नभई दिउँसोमा पनि तस्करी हुने गरेको स्थानीयले बताएका छन् । जिल्लाका विभिन्न नाकाबाट तस्करीको चिनी धमाधम भित्रिने गरेका छ । उद्योगीहरुले अवैधरुपमा भित्रिने चिनी नियन्त्रण गर्न उद्योगीहरुले सरकारसँग माग गरेका छन् ।
‘भन्सार छलेर आउने चिनीले नेपाली उत्पादनलाई मात्र असर गरेको छैन । राजस्वमा समेत करोडौं घाटा पुगेको छ । बजारमा तस्करीको भारतीय चिनी भित्रिएपछि नेपाली चिनीले मूल्य पाउन नसकेको लुम्बिनी चिनी उद्योग सुनवलका प्रशासन प्रमुख कुशप्रसाद सुवेदीले बताए । भारतबाट आउने चिनी नेपाली चिनीभन्दा धेरै गुणस्तरहीन रहेको उद्योगीहरुले बताएका छन् । भारतबाट तस्करी हुने चिनी बुटवल, नारायणगढ, पोखरा जाने गरेको छ । पश्चिम नवलपरासीबाट चिनी, चामल, गहँु मात्र होइन मोटरपार्टस्, कपडा, टायललगायतका सामान दिनहँु तस्करी हुने गरेको छ । भारतीय चिनी नेपाल भित्रिदा नेपाली चिनी बिक्री हुन सकेको छैन । चिनी बिक्री नहुँदा उद्योगले किसानसँग खरीद गरेको उखुको भुक्तानी दिन नसक्दा उखु किसान समेत मारमा परेका छन् ।
