नवलपरासी। पश्चिम नवलपरासीको सुनवल नगरपालिकाले आँखामा मोतिबिन्दु समस्या भएका विपन्न नगरवासीको आँखाको मोतिविन्दुको उपचारका लागि आर्थिक खर्च व्यहोर्ने भएको छ । नगरपालिका भित्र स्थायी बसोबास गर्ने बिपन्न नागरिकहरुको लागि आँखाको मोतीबिन्दु उपचार विशेष आर्थिक सुविधा निर्देशिका २०७९ अनुसार सो व्यवस्था गरिएको प्रमुख प्रशासकिय अधिकृत भक्तिराम मरासीनिले बताउनुभयो ।
निर्देशिका बमोजिम सुनवल नगरपालिका र डाक्टर बिनोद नीता कंडेल आँखा अस्पताल परासीबीच विहिबार सम्झौता पनि भएको छ । सम्झौतामा आँखामा मोतिबिन्दु समस्या भएका विपन्न नगरवासीको प्रति मोतिबिन्दुको अपरेसन सेवा वापत नगरपालिकाले ५ हजार २ सय रुपैया खर्च व्यहोर्ने उल्लेख छ । विहिबार नगरपालिकाका तर्फबाट नगर प्रमुख विमला अर्याल तथा अस्पतालका तर्फबाट अस्पताल व्यवस्थापकले सम्झौतामा हस्ताक्षर गर्नुभएको थियो ।
