नवलपरासी। पश्चिम नवलपरासीको सुनवलमा दोश्रो औद्योगिक ब्यापार मेला २०७९ को आयोजना गरिने भएको छ । सुनवल उद्योग वाणिज्य सँघको आयोजनामा आगामी माघ १० गतेदेखि २२ गतेसम्म सोमनाथ हाटबजार परिसरमा औद्योगिक ब्यापार मेला आयोजना गर्न लागिएको सुनवल उद्योग वाणिज्य सँघका अध्यक्ष रमेश कर्माचार्यले जानकारी दिए ।
१३ दिनसम्म सँचालन हुने मेलामा करिव एक लाख दर्शकले अवलोकन गर्ने अपेक्षा छ । करिव २ सय स्टल रहने मेलामा नेपालका घरेलु, साना, मझौला तथा ठूला उद्योगका अतिरिक्त विदेशी वस्तुहरु र पहाडी, कृषिजन्य उत्पादनको प्रदर्शनी गरिने अध्यक्ष कर्माचार्यले बताए ।
करिव ५५ लाख रुपैयाँ खर्च अनुमान गरिएको महोत्सवमा करिव १० करोड रुपैयाँको कारोवार हुने आँकलन आयोजकको रहेको महासचिव तेज प्रसाद भण्डारीले जानकारी दिए । उनका अनुसार वृद्धहरुलाई निःशुल्क प्रवेशको ब्यवस्था मिलाईएको मेलामा ४० वटा स्टल सँघ आवद्ध साना उद्योग र कृषि क्षेत्रलाई छुट्याइएको छ ।
