काठमाडौं । नेपालको शैक्षिक परामर्श क्षेत्रमा दुई दशकदेखि निरन्तर सेवा दिँदै आएको अग्रणी संस्था कंगारु एजुकेशन फाउण्डेशनले आफ्नो २० औं स्थापना दिवस (कंगारु डे) भव्य रूपमा मनाएको छ। काठमाडौंको बागबजारस्थित पर्पल हाउसमा मुख्य कार्यालय रहेको यस संस्थाले देशभरका ११ वटा शाखा कार्यालयहरूमार्फत विभिन्न कार्यक्रम गरी यो उत्सव मनाएको हो।
मुख्य आकर्षणहरू:
-
यूके तथा न्युजिल्याण्ड भर्ना दिवस: वार्षिकोत्सवको अवसरमा आयोजना गरिएको यस विशेष कार्यक्रममा यूके र न्युजिल्याण्डका ४५ भन्दा बढी शैक्षिक संस्थाहरूको सहभागिता रहेको थियो। जहाँ विद्यार्थीहरूले प्रत्यक्ष परामर्श र छात्रवृत्तिको अवसर प्राप्त गरे।
-
सामाजिक उत्तरदायित्व: संस्थाले आफ्नो २० औं वर्षको खुसियालीमा रक्तदान कार्यक्रम, महिला फुटबल खेलाडीहरूको सम्मान र पुस्तकालय स्थापनाको महत्वपूर्ण घोषणा गरेको छ।
-
रणनीतिक मार्गचित्र: आगामी ५ वर्षका लागि डिजिटल रूपान्तरण र सेवा विस्तारलाई केन्द्रित गर्दै संस्थाले आफ्नो नयाँ रणनीतिक योजना सार्वजनिक गरेको छ।
संस्थाका संस्थापक तथा सिइओ महेश बाबु तिमल्सिनाले भन्नुभयो, “२० वर्षको यो यात्रा विश्वास र समर्पणको प्रतिफल हो। अब हामी ‘भविष्य उज्जवल छ’ भन्ने मूल नाराका साथ अझ प्रविधिमैत्री र प्रभावकारी सेवा प्रदान गर्न प्रतिबद्ध छौं।”
साँझ आयोजित विशेष समारोहमा उत्कृष्ट कार्यसम्पादन गर्ने कर्मचारी तथा शाखाहरूलाई सम्मान गरिएको थियो। अष्ट्रेलिया, न्युजिल्याण्ड, यूके, अमेरिका र क्यानाडाका लागि शैक्षिक परामर्श दिँदै आएको कंगारुले आगामी दिनमा विद्यार्थीकेन्द्रित सेवालाई थप सुदृढ बनाउने प्रण गरेको छ।
