नवलपरासी– राष्टिय स्वतन्त्र पार्टी (रास्वपा)को लुम्बिनी प्रदेशको अधिवेशनबाट शालिकराम घिमिरे सभापतिमा निर्वाचित हुनुभएको छ ।
सभापतिका लागि ६ जनाबीच प्रतिस्पर्धा भएको थियो । उनीहरुमध्ये कसैले पनि ५१ प्रतिशत कटाउन नसकेपछि शालिकराम(रुपन्देही) र गोपाल घिमिरे(अर्घाखाँची) बीच पुन ः मतदानको तयारी गरिएको थियो । अन्तिममा शालिकराम सहमतिमा निर्वाचित भएको अधिवेशन प्रतिनिधि एक रास्वपा नवलपरासीका सभापति रवि पाण्डेले परासी पत्र अनलाइनलाई जानकारी दिनुभयो । नवनिर्वाचित शालिकराम सभापति रवि पक्षका हुनुहुन्छ भने गोपाल बालेन पक्षका हुनुहुन्छ ।
पश्चिम नवलपरासीबाट तीन जना निर्वाचित
विभिन्न कलष्टरका लागि भएको निर्वाचनमा नवलपरासीबाट तीन जना प्रदेश समितिमा निर्वाचित भएका छन् । त्यसरी निर्वाचित हुनेमा खस आर्य महिलातर्फ प्रभा ज्ञवाली र क्षेत्रगततर्फ ( क्षेत्र नम्बर २) युवराज ढकाल निर्विरोध निर्वाचित हुनुभएको हो भने क्षेत्रगतर्फ(क्षेत्र नम्बर १) इन्जिनियर विकास पाण्डे मतदानमार्फत निर्वाचित हुनुभएको नवलपरासीका पार्टी सभापति पाण्डेले जानकारी दिनुभयो ।
त्यसैगरी समितिको समानुपातिकतर्फको खस आर्य सदस्यमा गोपाल घिमिरे, खस आर्य महिला सदस्यमा मुना हमाल, शीला कुमारी केसी, भगवती न्यौपाने ढकाल निर्विरोध निर्वाचित हुनुभएको छ ।
त्यस्तै दलित सदस्यमा निरज गौतम, कृष्णा विक, जनजाति सदस्यमा भोजबहादुर बुढाथोकी, सुमित श्रेष्ठ निर्विरोध निर्वाचित हुनुभएको छ ।
थारु सदस्यतर्फ प्रभा चौधरी निर्विरोध निर्वाचित हुनुभएको हो भने गोविन्दबहादुर थारु, बिहारी चौधरी निर्वाचित हुनुभएको छ । मधेशी सदस्यतर्फ गौतमप्रसाद पाण्डे, रञ्जयकुमार गुप्ता निर्वाचित हुनुभएको छ । मधेशी महिला सदस्यमा नौशिन फातिमा निर्विरोध निर्वाचित हुनुभएको छ ।
क्षेत्रगत सदस्यतर्फ कपिलवस्तु–१ मा कमलप्रसाद पाण्डेय, कपिलवस्तु–२ मा आशा पन्था गुप्ता, र कपिलवस्तु–३ मा अर्जुन सपकोटा निर्विरोध निर्वाचित हुनुभएको छ । रूपन्देही–१ विष्णु प्रसाद पौडेल, रूपन्देही–२ मा निर्मला भट्टराई, रूपन्देही–३ मा मायादेवी खनाल, रूपन्देही–५ पार्वती देवकोटा निर्वाचित हुनुभएको छ । अर्घाखाँची–१ मा अभिमन्यु पाण्डे निर्वाचित हुनुभएको छ । : परासी पत्र
