नवलपरासी (बर्दघाट सुस्तापश्चिम)को सरावल गाउँपालिका–१ हर्कट्टास्थित पूर्व–पश्चिम राजमार्गमा शुक्रबार साँझ दुई ट्रक आपसमा ठोक्किँदा एक पैदलयात्रीको मृत्यु भएको छ।
जिल्ला प्रहरी कार्यालयका अनुसार साँझ करिब ६:४० बजे पश्चिमबाट पूर्वतर्फ आउँदै गरेको लु २ ख ४३३ नम्बरको मार्बल बोकेको ट्रक विपरीत दिशाबाट जाँदै गरेको ग १ क २९६५ नम्बरको ट्रकसँग ठोक्किएपछि अनियन्त्रित भई सडकमा हिँडिरहेका पैदलयात्रीलाई समेत ठक्कर दिएको थियो।
दुर्घटनामा करिब ५५–६० वर्षका हालसम्म नाम–थर नखुलेका पुरुषको टाउको तथा शरीरका विभिन्न भागमा गम्भीर चोट लागेको थियो। उपचारका लागि जिल्ला अस्पताल परासी लगिएकोमा चिकित्सकले मृत घोषणा गरेका हुन्। शव सोही अस्पतालमा राखिएको प्रहरीले जनाएको छ।
दुर्घटनामा संलग्न दुवै ट्रक र चालकलाई प्रहरीले नियन्त्रणमा लिएको छ। ट्रक चालकहरूमा सुनवल नगरपालिका–३ निवासी ३७ वर्षीय धर्मराज चमार र रुपन्देहीको देवदह नगरपालिका–९ भलुही निवासी ३५ वर्षीय किसान खड्का रहेका छन्।घटनाबारे थप अनुसन्धान भइरहेको छ।
