परासी, असार २१ — जिल्ला प्रहरी कार्यालय नवलपरासी (पश्चिम) ले अवैध रूपमा क्रिप्टोकरेन्सी कारोबार गरेको आरोपमा एक जनालाई पक्राउ गरेको छ।

प्रहरीका अनुसार पाल्हीनन्दन गाउँपालिका–२ स्थित ‘Tha Vodka Valley Dance Bar’ बाट लुम्बिनी प्रदेश प्रहरी कार्यालय दाङ र जिल्ला प्रहरी कार्यालय नवलपरासी (पश्चिम) बाट खटिएको प्रहरी टोलीले रामग्राम नगरपालिका–१६ का २० वर्षीय मनोहर गोंड लाई प्राप्त गोप्य सूचनाका आधारमा नियन्त्रणमा लिएको हो।

प्रहरीले निजले प्रयोग गरिरहेको iPhone 17 Pro Max मोबाइल फोन जाँच गर्दा Bybit र Binance एपमार्फत ठूलो परिमाणमा क्रिप्टोकरेन्सी (USDT) कारोबार गरेको देखिएको जनाएको छ।  प्रहरीका अनुसार Bybit मा २६,३२४.६३०३२ USDT (करिब रु. ४०,३३,३८१) र Binance मा १,८०५.४२६४२ USDT (करिब रु. २,७३,२५९) गरी हालको विनिमय दरअनुसार करिब रु. ४२,०६,६४० बराबरको कारोबार भएको प्रारम्भिक अनुसन्धानबाट खुलेको प्रहरीले जनाएको छ।

पक्राउ परेका गोंडविरुद्ध मुद्रा सम्बन्धी कसुर (भौतिक मुद्राको प्रयोग गर्न नहुने) अन्तर्गत मुद्दा दर्ता गरी सम्मानित अदालतबाट म्याद थप अनुमति लिई थप अनुसन्धान भइरहेको जिल्ला प्रहरी कार्यालय नवलपरासी (पश्चिम) ले जनाएको छ।