काठमाडौँ, नेपालस्थित इजरायली दूतावासले आकस्मिक बाढीबाट गम्भीर प्रभावित क्षेत्रहरूमध्ये एक, धादिङको गल्छी गाउँपालिका वडा नं. ६, बैरेनीका बाढी प्रभावित समुदायलाई आपत्कालीन मानवीय सहायता प्रदान गरेको छ।
उप-नियोग प्रमुख सुश्री जानान बेबारले प्रभावित क्षेत्रको भ्रमण गरी बाढीका कारण तत्काल समस्यामा परेका व्यक्ति तथा परिवारलाई सहयोग पुर्याउन आपत्कालीन ‘गो-ब्याग’ (Emergency Go-Bags) र अत्यावश्यक सामग्री भरिएका बाकसहरू हस्तान्तरण गर्नुभयो।
यो सहयोग दूतावासको आपत्कालीन राहत प्रतिक्रियाको पहिलो चरण हो। स्थलगत रूपमा देखा परेका आवश्यकताहरूको मूल्याङ्कन गर्न इजरायली दूतावास सम्बन्धित नेपाली अधिकारीहरूसँग निरन्तर सम्पर्कमा रहेको छ। आगामी दिनहरूमा थप आवश्यकता पहिचान भएअनुसार थप सहयोग र सहायता उपलब्ध गराइनेछ।
नेपालका लागि इजरायली राजदूत श्मुलिक अरिए बासले भन्नुभयो, “यस कठिन समयमा इजरायल नेपालका जनताको साथमा छ। हाम्रा विचारहरू बाढीबाट प्रभावित सबै जनासँग छन्, र हामी आशा गर्दछौँ कि यो प्रारम्भिक सहयोगले प्रभावित समुदायहरूलाई केही तत्काल राहत प्रदान गर्नेछ। नेपालले यस सङ्कटको सामना गरिरहँदा सहयोग गर्न इजरायल प्रतिबद्ध छ।”
इजरायली दूतावासले प्रभावित समुदायका साथै बाढी प्रभावितहरूलाई सहयोग गर्न खटिएका नेपाली अधिकारीहरू, उद्धारकर्मीहरू र स्वयंसेवकहरूप्रति आफ्नो ऐक्यबद्धता प्रकट गर्दछ।