नेपालमा भोटेकोशी नदीमा आएको बाढी तथा पहिरोका कारण उत्पन्न कठिन परिस्थितिमा अन्तर्राष्ट्रिय समुदायको सहयोग र ऐक्यबद्धता निरन्तर जारी छ। यसै क्रममा नर्वे सरकारले युरोपेली संघको ‘इयु सिभिल प्रोटेक्सन मेकानिज्म’ (EU Civil Protection Mechanism) मार्फत पठाएको आपतकालीन सहायता सामग्रीको पहिलो खेप काठमाडौं आइपुगेको छ। नेपालमा बाढी प्रभावित नागरिकहरूको सहयोगका लागि पठाइएको यस उडानमा अति आवश्यक मेडिकल उपभोग्य वस्तुहरू, प्राविधिक उद्धार उपकरणहरू तथा ऊर्जासम्बन्धी सामग्रीहरू समावेश रहेका छन्।
त्रिभुवन अन्तर्राष्ट्रिय विमानस्थलमा आयोजित हस्तान्तरण कार्यक्रममा युरोपेली संघको नागरिक सुरक्षा तथा मानवीय सहायता (EU ECHO) की प्रतिनिधि इजाबेल डि’हौटले उक्त सहायता सामग्री माननीय मन्त्री महावीर पुनलाई आधिकारिक रूपमा हस्तान्तरण गर्नुभयो। बाढी र पहिरोपछि प्रभावित क्षेत्रहरूमा तत्काल उद्धार, उपचार र पुनरुत्थानका कार्यहरू सहज बनाउनका लागि यी सामग्रीहरू प्रयोग गरिनेछन्।
भोटेकोशी बाढीपछि उत्पन्न मानवीय संकटलाई सम्बोधन गर्न युरोपेली संघ र यसका सहभागी राष्ट्रहरूले सहयोगलाई तीव्रता दिएका छन्। नर्वेको यो पहिलो राहत खेपपश्चात युरोपेली संघका अन्य साझेदार राष्ट्रहरूबाट पनि राहत सामग्री बोकेका थप उडानहरू यसै साता नेपाल आइपुग्ने तालिका रहेको छ।
काठमाडौंस्थित रोयल नर्वेजियन एम्बेसी, युरोपेली संघ र नेपालका सम्बन्धित सरकारी निकायहरूबीचको प्रत्यक्ष समन्वयमा राहत सामग्रीको संकलन र वितरण प्रक्रिया अघि बढाइएको छ। युरोपेली संघ तथा सहयोगी राष्ट्रहरूले यस कठिन समयमा नेपाल र नेपाली जनताको साथमा रहँदै आपतकालीन सहयोगलाई थप प्रभावकारी बनाउने प्रतिबद्धता व्यक्त गरेका छन्।
