पुजा लम्साल,नवलपरासी । हिंसा लुकाएर बस्नुहुँदैन भन्ने चेतनाको विकास संगै नवलपरासीमा घरेलु हिंसाका घटना बाहिर आउन थालेका छन् । पहिलेपहिले घरभित्रको कुरा बाहिर लैजानुहुँदैन भन्ने सामाजिक मानसिकता बोकेका महिलाहरुमा चेतनाको विकास भएसँगै घरेलु तथा लैङ्गिक हिंसाका घटना बाहिर आउन थालेका हुन् ।तर हिंसाका घटना वाहिर आउन थाले संगै त्यसको न्यूनिकरणमा पनि उत्तिकै चुनौती छ ।
जिल्ला प्रहरी कार्यालय नवलपरासी पश्चिमले सार्वजनिक गरेको त्रिवर्षिय तथ्याङ्क अनुसार जिल्लामा घरेलु हिंसा र लैङ्गिक तथा छिमेकी हिंसाका गरी ९ सय उजुरी परेका छन् ।
पछिल्लो तिन वर्षमा जिल्ला प्रहरी कार्यालयमा दर्ता भएका घरेलु हिंसाका ५ सय निवेदनहरु मध्ये ४५९ वटा निवेदन मिलापत्र भएका छन् । २० वटा निवेदन अन्य निकायमा गई अझै २२ वटा निवेदनको काम वाकी रहेको जिल्ला प्रहरी कार्यालयका प्रहरी नायव उपरिक्षक भोजराज पाण्डेले जानकारी दिनुभयो ।
चालु आव २०७९/८० को पछिल्लो ८ महिनामा मात्र घरेलु हिंसाका १७२ वटा निवेदन दर्ता भएको छ । जसमध्ये १५२ वटा मिलापत्र गर्न सफल भएको र ४ वटा मुद्धा अन्य निकायमा गएको तथा १७ वटाको काम वाँकी रहेको पाण्डेले बताउनुभयो ।
यस्तै आव २०७८/७९ मा १९४ घरेलु हिंसाका निवेदन दर्ता भएकोमा १८२ को मिलापत्र गरिएको छ भने आव २०७७/७८ मा १३४ निवेदन दर्ता भएकामा १२५ निवेदनको मिलापत्र गरिएको छ ।
प्रहरीमा आएको उजुरीमध्ये मादक पदार्थ सेवन गरी गालीगलौज तथा कुटपिट गर्ने, परिवारमा खान-लगाउन नदिने, घरायसी झैँझगडा, बहुविवाह लगायतको घटना रहेका छन् ।
यस्तै पछिल्लो ३ वर्षमा जिल्लामा ४ सय लैङ्गिक तथा छिमेकी हिंसाका घटना दर्ता भएका छन् । दर्ता भएका मध्ये ३७० वटाको मिलापत्र गरिएको पाण्डेले बताउनुभयो । चालु आव २०७९/८० को हाल सम्म मात्र लैङ्गिक तथा छिमेकी हिंसाका १३० वटा निवेदन दर्ता भएकोमा १२३ वटा निवेदन मिलापत्र गरिएको छ ।
यस्तै आव २०७८/७९ मा दर्ता भएका लैङ्गिक तथा छिमेकी हिंसाका १६३ उजुरीमा १५१ उजुरीको मिलापत्र गरिएको छ भने आव २०७७/७८ मा दर्ता भएका १०७ लैङ्गिक तथा छिमेकी हिंसाका उजुरीमा ९६ घटनाको मिलापत्र गरिएको छ ।
प्रहरी र जनताबीचको सुमधुर सम्बन्ध स्थापित गर्न समुदाय-प्रहरी साझेदारी कार्यक्रम, लागूऔषध दुव्र्यसनी, बालविवाह, बहुविवाह लगायत सामाजिक अपराधका विषयमा विद्यालयस्तरमा पुगेर सचेतनामुलक कार्यक्रम सञ्चालन गरिएका छन् ।
