पुराण गुरुङ ,सुनवल । अस्नैया आदर्श क्याम्पस सुनवल ७ नवलपरासीमा स्वागत तथा विदाई कार्यक्रम सम्पन्न भएको छ । स्वतन्त्र विद्यार्थी परिषद, अस्नैया आदर्श क्याम्पसको आयोजनामा सम्पन्न कार्यक्रममा विविएस प्रथम वर्षमा अध्ययनरत विद्यार्थीहरुलाई स्वागत गरी विविएस चौथो वर्ष पूरा गरेका विद्यार्थीहरुलाई विदाई तथा सफलताको कामना गरिएको थियो ।
कार्यक्रममा प्रमुख अतिथि सुनवल नगरपालिकाकी नगर प्रमुख बिमला अर्याल, जिल्ला विकास समन्वय समिति नवलपरासीका सदस्य शारदा परियार, सुनवल ७ का वडाध्यक्ष नारायण आचार्य, सुनवल कार्यपालिका सदस्य विनोद खाती, क्याम्पस सन्चालक समितिका सदस्य विश्वनाथ यादव, क्याम्पस प्रमुख विनोद पाण्डे लगायतले यस क्षेत्रमा क्याम्पसको सकारात्मक प्रभाव, समुदायको सहकार्य, क्याम्पसको भौतिक, आर्थिक तथा प्राविधिक समस्या र यसका समधानको विषयमा आफ्ना रायहरु प्रकट गर्दै नवप्रवेशी विद्यार्थीहरुलाई स्वागत तथा अन्तिम वर्षका विद्यार्थीहरुको शैक्षिक सफलताको कामना गर्नुभएको थियो ।
परिषदका अध्यक्ष हरिवोल सापकोटाको अध्यक्षतामा सम्पन्न कार्यक्रममा तेस्रो वर्षका छात्रा तथा परिषदका कोषध्यक्ष मनु गुरुङको स्वागत तथा सचीव मुना बिकले सन्चालन गर्नुभएको थियो ।
कार्यक्रममा विद्यार्थीका विविध साहित्यिक रचना , शैक्षिक तथा साङ्गितिक प्रतिभाहरुको प्रस्तुति रहेको थियो ।
