नवलपरासी । उद्योग वाणिज्य संघ सुनवलले यहि माघ १० देखि २२ गते सम्म संचालन हुने दोस्रो औधोगिक व्यापार मेलालाई सफल वनाउन विभिन्न संघ संस्था तथा संगठनहरुसंगको छलफललाई तिव्रता दिएको छ । सो अनुरुप मंगलवार संघले सुनवल क्षेत्रका आदीवासी जनजाती संगठनहरुसँग छलफल गरेको छ । छलफलमा सुनवल नगरपालिका भित्रका आदीवासी जनजाती संघ संगठनले मेलालाई सफल बनाउन एकजुट भएर अगाडी वढ्ने सहमति जनाएको आयोजक संस्था उद्योेग वाणिज्य संघ सुनवलका अध्यक्ष रमेश कर्माचर्याले बताउनुभयो ।
करिव २ सय स्टल रहने मेलामा नेपालका घरेलु, साना, मझौला तथा ठूला उद्योगका अतिरिक्त विदेशी वस्तुहरु र पहाडी, कृषिजन्य उत्पादनको प्रदर्शनी गरिने संघका महासचिव तेजु भण्डारीले जानकारी दिनुभयो । ५५ लाख खर्च हुने अनुमान गरिएको मेलामा १ लाख दर्शकले अवलोकन गर्ने र मेलाबाट करिव १० करोडको कारोबार गर्ने लक्ष्य राखिएको संघले जनाएको छ । वृद्धहरुलाई निःशुल्क प्रवेशको ब्यवस्था मिलाईएको मेलामा ४० वटा स्टल सँघ आवद्ध साना उद्योग र कृषि क्षेत्रलाई छुट्याइएको छ ।
