सुनवल । आँखा पाक्ने रोगको प्रकोप बढे पछि पश्चिम नवलपरासीको सुनवल नगरपालिकाका विद्यालय तिन दिन बन्द हुने भएका छन् । नगरपालिकाले आज एक सुचना जारी गर्दै नगर भित्र आँखा पाक्ने रोग बढ्दै गएको र विद्यालय उमेरका बालबालिका तथा शिक्षक प्रभावित भएकाले साउन २३, २४ र २५ गते तीन दिन पालिका भित्रका सबै शैक्षिक संस्था बन्द गर्ने निणर्य गरिएको जनाएको हो ।
नगरपालिकाका उपसचिव विष्णु प्रसाद गोतामेद्धारा हस्ताक्षरित सूचनामा यस विदालाई वर्षे बिदाबाट मिलान गर्ने जनाइएको छ । पश्चिम नवलपरासीमा आँखा पाक्ने रोगको प्रकोप बढेको छ । यसअघि जिल्लाको प्रतापपुर गाउपालिकाले पनि तिन दिन विद्यालय बन्द गरेको थियो । प्रकोप रोक्नका लागि आँखाको सरसफाइ, चस्माको प्रयोग र भीडभाडमा नजान आग्रह गरिएको छ ।
