माहुरीको बखान सबैको मुखमा
माहुरीको मह सबैको मुखमा
चाकै चोरेर चटक्कै चप्काई
माहुरीको कमाई पराइकै मुखमा ।
त्यसैले त माहुरीको गाथा गाउँदा रहेछन्
खाने, लुट्ने, चोर्ने सबैले गाथा गाउँदा रहेछन्
माहुरीको लार्भा नमार्ने र मह नचोर्ने हरुले बाहेक
स्वार्थी, धुर्त, फटाह सबैले गाथा गाउँदा रहेछन् ।
प्राकृतिक घार बनाएर माहुरी पल्काउँदा रहेछन्
तोरी बारी पहेंलपुर बनाई पल्काउँदा रहेछन्
मह चप्प चाट्न चाहनेहरुले चटकेहरुले
चिनीको चास्नी चटाई पल्काउँदा रहेछन् ।
माहुरीको कर्तव्यपूणर् कामकै कारणले
मिहिनेती माहुरीको महको मोहकै कारणले
घारलाई घामपानी र मलसाँप्रोबाट बचाउने
घण्टी, तारबेर केवल महकै मोहको कारणले ।
महकै मातमा माहुरीलाई मार्न मन पराउँदा रहेछन्
अलिकति चिल्न थालेको ठाडै मार्न मन पराउँदा रहेछन्
माहुरीको लार्भा, मह, चाका सबै लुटिसकेपछि
बिचरा माहुरीलाई मर्दा ठान्नेले मार्न मन पराउँदा रहेछन् ।
पुराण ल्हेगे गुरुङ्ग ’चिउरी खर्के’
सुनवल-३, नदुवा, नवलपरासी पश्चिम
