भूमही / नर्किय-यात्राका कारण चर्चित बनेको बुटवल—नारायणगढ–सडक खण्ड विस्तार आयोजनालाई निर्माण सामग्री उपलब्ध गराएका भूमहीका व्यवसायीले लामो समयदेखि भुक्तानी नपाएकोमा आक्रोशित भई ठेकेदारको क्याम्प घेराऊ गरेका छन् ।
निर्माणाधीन सडक़ आयोजनाको पश्चिम खण्ड रानीपाकड़ स्थित कार्यालयमा प्लेकार्डसहित तत्काल बक्यौता रकम भुक्तानीको माग गर्दै व्यवसायी मंगलबारदेखि आन्दोलित भई क्याम्प घेराऊ गरेका हुन् ।
चैत महिनादेखि ठेकेदार कम्पनी चाइना स्टेटले भुक्तानी नदिंदा व्यवसायी मर्कामा परेको उनले सुनाए । व्यवसायीले १५ दिनभित्र भुक्तानी नदिएमा थप संघर्षको कार्यक्रम अगाडि बढाउने चेतावनी दिएका छन् । भुक्तानीका लागि पटक–पटक कार्यालयमा धाउँदा पनि बेवास्ता गरिएको व्यवसायीको गुनासो छ ।
ढुंगा, गिट्टी र बालुवाका १३ वटा सप्लायर्स र क्रसर व्यवसायीको ८० करोड, पेटी ठेकेदारको १५ करोड र ढुवानीका लागि प्रयोग भएका सवारी साधनको ६ करोड गरेर १ अर्बभन्दा बढी रकम भुक्तानी पाउन बाँकी रहेको नेपाल क्रसर तथा खानी उद्योग व्यवसायी महासंघका उपाध्यक्ष रामु अधिकारीको भनाई छ ।
व्यवसायीलाई उधारो रकम भुक्तानी नदिएको ठेकेदारले वर्षाको कारण देखाउँदै रोकिएको नारायणगढ–बुटवल सडक खण्डको काम अझै सुरु गरेका छैनन् । तेस्रो पटक थप भएको म्याद तीन महिना सकिंदा पनि काम सुरु नहुँदा यो खण्डको यात्रा थप कष्टकर बन्दै गएको छ ।
सम्झौता अनुसार काम भएको भए २०७५ चैतबाट सुरु भएर २०७९ साउनमा निर्माण सम्पन्न हुने थियो । तर, कोरोना, निर्माण सामग्रीको अभावजस्ता कारण देखाएर ठेकेदारले पर्याप्त जनशक्ति परिचालन नगर्दा सडक निर्माण अहिले पनि अलपत्र छ । पहिलो पटक २०८० साउन ११ गतेसम्मका लागि म्याद थप भएको थियो ।
पहिलो पटक थप भएको म्यादमा पनि काम सम्पन्न नभएपछि दोस्रो पटकका लागि २०८१ साउन ८ गते सम्म म्याद थप गरेको थियो । तर दोस्रो पटक पनि काम सम्पन्न नभएपछि तेस्रो पटकका लागि २०८२ साउन ८ गतेसम्मका लागि म्याद थप भएको छ । वर्षात सकिएको महिनौ बिती सक़्क़दा समेत काम सुरू नहूदा ठेकेदार आयोजनाको काम नगरने मनसाय को कि भन्ने जन बुझाई रहेको बुझिएको छ ।
