काठमाडौँ । नेपाल चेम्बर अफ कमर्सले प्रधानमन्त्री पुष्पकमल दाहालको ध्यानाकर्षण गराएको छ। चेम्बर अध्यक्ष राजेन्द्र मल्ल नेतृत्वको टोलीले ८ बुँदे सुझाव दिएको हो। बैंक तथा वित्तीय संस्थामा उच्च ब्याजदर एवं तरलता अभावका कारण लगानीको वातवरण बन्न नसकेको अध्यक्ष मल्लले बताए। ‘दोहोरो अंकको आर्थिक वृद्धि हासिल गर्ने सरकारी लक्ष्य पूरा गर्न एकल अंकको ब्याजदर कायम गरिनुपर्दछ। दिगो आर्थिक विकास र स्थायित्वका लागि लगानीको वातावरण बन्न आवश्यक छ,’ उनले भने ‘मुलुकको पुँजीगत खर्च समयमै हुन नसक्दा पनि अर्थतन्त्रले लय समाउन नसकेको छ।’ अध्यक्ष मल्लले बाँझो जमिनलाई सदुपयोग गरी कृषि उत्पादनमा आधुनिकीकरणमार्फत मुलुकलाई आत्मनिर्भर बनाउनुपर्ने बताए।
प्रधानमन्त्री दाहालले सरकारको मुख्य ध्यान अर्थतन्त्रको सुधारमा केन्द्रित रहेको बताएका छन्। नेपाल चेम्बर अफ कमर्सका अध्यक्ष राजेन्द्र मल्लसहितका पदाधिकारीसँग खुमलटारस्थित निवासमा बुधबार भएको भेटघाट कार्यक्रममा बोल्दै दाहालले अर्थतन्त्रमा पछिल्लो समय देखिएको समस्याबारे आफू जानकार रहेको बताएका छन्। ‘मुलुकको अर्थतन्त्र जटिल र चुनौतीपूणर् अवस्थाबाट गुज्रिरहेको छ।
ब्याजदर वृद्धि, तरलता समस्या लगायतका विषयमा सरकार जानकार छ। अर्थतन्त्रलाई कसरी सुधार गर्ने भन्नेमा सम्पूणर् ध्यान केन्द्रित भएको छ’ प्रधानमन्त्री दाहालले भने ‘रुस-युक्रेन युद्ध र कोभिड १९ का कारणले विश्वव्यापी रूपमै अर्थतन्त्रमा जोखिमको अवस्था सिर्जना भएको छ।’ प्रधानमन्त्री दाहालले वर्तमानको चुनौतीलाई अवसरमा बदल्न सरकार प्रतिवद्ध रहेको बताए।