परासी, १७ भदौ / ईस्लाम धर्मका प्रवर्तक हजरत मोहम्मद पैगम्बरको १५०० औँ जन्म जयन्ती नवलपरासीमा भव्यताका साथ मनाइने भएको छ ।
मोहम्मद जयन्ती सामीप्य हुदै जाँदा यहाँका मुस्लिम समुदाय बृहत र्याली, शुभकामना आदानप्रदानसहित विभिन्न कार्यक्रम गरी धुमधामका साथ मनाउने तयारीमा जुटेका हुन् ।
नवलपरासीमा तीन दिनसम्म हर्षाेल्लासका साथ मोहमम्द जयन्ती मनाउन लागिएको ओल्मा फाउण्डेसन नेपालका केन्द्रीय अध्यक्ष सैदय गुलाम हुसैनले जानकारी दिनुभयो ।
सोमबार परासी प्रेस क्लबसंगको साक्षात्कार कार्यक्रममा बोल्दै केन्द्रीय अध्यक्ष हुसैनले यस वर्ष भदौ २० गते मनाइने मोहम्मद जयन्तीलाई धुमधामका साथ मनाउन विभिन्न सामाजिक कार्यक्रमहरु समेत तय गरि तयारी थालिएको बताउनुभयो ।
उहाँका अनुसार ओल्मा फाउण्डेसन नेपाल र जिल्ला मदरसा,मस्जिद, कब्रस्तान संरक्षण समितिको आयोजनामा भदौ १८ गते परासी क्याम्पसमा शुभकामना आदानप्रदान कार्यक्रम आयोजना हुनेछ भने १९ गते विहान बुद्धचोकमा रक्तदान र साँझ शान्तिको कामना गर्दै पन्ध्र सय दीपप्रज्वलन, २० गते विहान पृथ्वीचन्द्र अस्पतालका बिरामीलाई फलफूल वितरण र दिउँसो बृहत र्यालीसहित खुशीयालीका साथ मोहम्मद जयन्ती मनाइँदैछ ।
जिल्लाभरबाट करिब ५ हजारको संख्यामा मुस्लिम समुदायको सहभागिता रहने बृहत र्याली भदौ २० मा रामग्राम–१२ बाट शुरु हुने जिल्ला मदरसा,मस्सिद,कब्रस्थान संरक्षण समितिका अध्यक्ष अमिरुल्लाह मियाले जानकारी दिनुभयो ।
र्यालीलाई मर्यादीत र व्यवस्थित गर्न १ हजार स्वयमसेवी युवाहरु खटाइने उहाँले बताउनुभयो ।
समितिका उपाध्यक्ष काशिद अलिका अनुसार मोहम्मदको जन्म ईस्लामी पात्रो हिजरी संवतको रवि अव्वल महिनामा साउदीअरबको मक्कामा भएको थियो । यो दिवसले मुस्लिम समुदायलाई एकताको सुत्रमा बाँध्नुको साथै भाइचाराको सम्बन्ध प्रगाढ़ रहने बिश्वास र मान्यता रहेको अलिले बताउनुभयो ।
