प्रतिनिधिसभा निर्वाचनको सुरक्षाका लागि म्यादी प्रहरी भर्ना गर्न प्रस्ताव गरिएको छ ।
प्रहरी प्रधान कार्यालयले २१ फागुनका लागि तय भएको चुनावका लागि कम्तीमा १ लाख १५ हजार म्यादी प्रहरी भर्ना गर्नुपर्ने प्रस्तावसहित प्रारम्भिक खाका तयार पारेको हो ।
आमनिर्वाचन २०७९ को सुरक्षा व्यवस्थापनलाई आधार मानेर सुरक्षा रणनीति बनाइएको प्रहरी प्रधान कार्यालयले जनाएको छ । खाकाअनुसार म्यादी भर्ना भए उनीहरूलाई तालिम, पारिश्रमिक, भत्ता, पोसाकलगायतमा ४ अर्ब रुपैयाँभन्दा बढी खर्च लाग्ने अनुमान छ ।
आसन्न चुनाव लक्ष्य गरेर नेपाली सेनाका सहायक रथीको नेतृत्वमा प्रहरी, सशस्त्र प्रहरी र राष्ट्रिय अनुसन्धान विभागका अधिकारी सम्मिलित निर्वाचन सुरक्षासम्बन्धी एकीकृत कार्यदल बनिसकेको छ ।
त्यस्तै सहसचिव आनन्द काफ्लेको संयोजकत्वमा गृह मन्त्रालयले पनि निर्वाचन सुरक्षासम्बन्धी छुट्टै कार्यदल बनाइसकेको छ । सेनाका सहायक रथीको नेतृत्वमा रहेको समितिबाट बनेको सुरक्षा निकायको निर्वाचन सुरक्षा खाकालाई थप अध्ययन गरी गृह मन्त्रालयले अन्तिम रूप दिएर केन्द्रीय सुरक्षा समितिमा पेस गर्नेछ ।
त्यसपछि निर्वाचन आयोगसँग समन्वय गरेर चुनावी सुरक्षा योजनालाई अन्तिम रूप दिने तयारी छ
