नवलपरासी (बर्दघाट नगरपालिका–१२) भटौलियास्थित कजारिया रमेश टायल्स उद्योगमा कार्यरत दुई मजदुरको मृत्यु प्रकरणमा चार जनामाथि मुद्दा दायर गरिएको छ। उद्योगको लापरबाहीका कारण मजदुरको मृत्यु भएको आरोपमा उनीहरूमाथि कारबाही अघि बढाइएको हो।
मृतकका आफन्तले जाहेरी दिएपछि मुद्दा दर्ता भई अनुसन्धान प्रक्रिया अघि बढेको जिल्ला प्रहरी कार्यालय नवलपरासीका सूचना अधिकारी इन्स्पेक्टर सुशिल घिमिरेले जानकारी दिनुभयो। मुद्दा चलाइएकामध्ये जनसम्पर्क वरिष्ठ प्रबन्धक रमेश न्यौपानेसहित दुई जना हिरासतमा छन् भने दुई भारतीय कर्मचारी फरार रहेका छन्।
घटनापछि मजदुरलाई तत्काल उपचारका लागि नलगेको र सुरक्षाका मापदण्ड पालना नगरेको प्रारम्भिक अनुसन्धानबाट देखिएको प्रहरीले जनाएको छ। उनीहरूमाथि मुलुकी अपराध संहिता २०७४ को दफा १८१ (लापरबाहीपूर्ण काम गरी ज्यान मार्न नहुने) अन्तर्गत मुद्दा दायर गरिएको हो।
गत बिहीबार राति उद्योगमा काम गरेर कोठामा सुतेका अवस्थामा नवलपरासी बर्दघाट–१३ धनेवाका ४० वर्षीय होमबहादुर थापा र भारत उत्तर प्रदेश प्रतापगढका ३० वर्षीय विनोदकुमारको मृत्यु भएको थियो। ग्यास लिक हुँदा निसासिएर मृत्यु भएको आशंका गरिएको छ। मृतक दुवै ग्यासी फायर (अग्नि नियन्त्रण) प्लान्टमा कार्यरत मजदुर थिए।
घटनाको निष्पक्ष छानबिन र दोषीमाथि कारबाहीको माग गर्दै स्थानीय र मृतकका आफन्तले उद्योगमा तालाबन्दी गरेका छन्।
कसुर ठहर भएमा दोषीलाई तीनदेखि दस वर्षसम्म कैद र ३० हजारदेखि एक लाख रुपैयाँसम्म जरिबाना हुने कानुनी व्यवस्था रहेको प्रहरीले जनाएको छ।