परासी / पुर्बी नवलपरासी (नवलपुर)को हुप्सेकोट गाउँपालिकाबाटै अब जग्गा रजिस्ट्रेसन, नामसारी, धितोसम्बन्धी काम तथा नक्सा प्रमाणितलगायत भूमि व्यवस्थापनसम्बन्धी सेवा लिन सकिने भएको छ।
गाउँपालिकाले आइतबारदेखि औपचारिक रूपमा स्थानीय तहबाटै भूमि व्यवस्थापन सेवा सञ्चालनमा ल्याएको हो।
नेपालमा यस्तो सेवा सञ्चालनको अनुमति पाउने हुप्सेकोट ३६औँ स्थानीय तह हो भने कार्यान्वयनमा ल्याउने हिसाबले १०औँ पालिका बनेको छ।
गण्डकी प्रदेशमा भने हुप्सेकोटबाट पहिलोपटक स्थानीय तहस्तरमै भूमि व्यवस्थापन सेवा सुरु गरिएको हो।
सेवा शुभारम्भका क्रममा स्थानीय जनप्रतिनिधि बुद्धिमान तामाङलाई नक्सा प्रमाणित प्रमाणपत्र हस्तान्तरण गरिएको थियो।
कार्यक्रममा जिल्ला समन्वय समिति नवलपुरका प्रमुख बाबुराम विश्वकर्माले भूमि व्यवस्थापनजस्तो नागरिकको दैनिक जीवनसँग प्रत्यक्ष जोडिएको सेवा गाउँघरमै उपलब्ध हुनु महत्वपूर्ण उपलब्धि भएको बताए। उनका अनुसार स्थानीय तहबाटै सेवा पाएपछि नागरिकको समय र खर्च दुवै बचत हुनेछ।
प्रमुख जिल्ला अधिकारी जगदिश्वर उपाध्यायले सेवा प्रवाहमा पारदर्शिता, सुशासन र कानुनी प्रक्रियाको पूर्ण पालना गर्नुपर्नेमा जोड दिए।
गाउँपालिका अध्यक्ष लक्ष्मीदेवी पाण्डेले भूमि व्यवस्थापन सेवा गाउँपालिकामै सुरु भएपछि सामान्य जग्गासम्बन्धी कामका लागि सदरमुकाम धाउनुपर्ने नागरिकको बाध्यता कम हुने बताइन्। उनले सेवाग्राहीलाई सहज, पारदर्शी र बिचौलियामुक्त वातावरणमा सेवा उपलब्ध गराउने प्रतिबद्धता व्यक्त गरिन्।
भूमि व्यवस्थापन कार्यालय नवलपुरका निमित्त प्रमुख घनश्याम गाहाका अनुसार हुप्सेकोटबाट जग्गा रजिस्ट्रेसन, धितोसम्बन्धी काम, जग्गा नामसारी, नक्सा प्रमाणितलगायत सेवा प्रदान गरिनेछ। सेवाग्राहीको आवश्यकता र मागका आधारमा थप सेवा क्रमशः विस्तार गरिने उनले जानकारी दिए।
कार्यक्रममा जिल्ला प्रहरी कार्यालय नवलपुरका प्रमुख युवराज खड्का, जिल्ला नापी कार्यालय नवलपुरका प्रमुख पूर्णहरि सुवेदीलगायतको सहभागिता थियो।
स्थानीय तहबाटै भूमि व्यवस्थापन सेवा सुरु भएसँगै हुप्सेकोटका नागरिकले जग्गासम्बन्धी कामका लागि जिल्ला सदरमुकामसम्म पुग्नुपर्ने समय, खर्च र झन्झटबाट राहत पाउने अपेक्षा गरिएको छ। गाउँपालिकाबाटै सेवा विस्तार हुनु भूमि व्यवस्थापनको विकेन्द्रीकरणतर्फको महत्वपूर्ण कदमका रूपमा लिइएको छ।
पश्चिम नवलपरासीमा भने एउटा स्थानीय सरकारले पनी यो भूमि सेवा संचालन गर्न तत्परता देखाएको छैन ।
