पश्चिम नवलपरासी
पश्चिम नवलपरासीको प्रतापपुर गाउँपालिका अध्यक्ष उमेशचन्द्र यादव फरार रहेका छन् । सरकारी छाप तथा लेटरप्याड किर्ते गरी दुरुपयोग गरेको मुद्दामा नवलपरासी जिल्ला अदालतबाट पक्राउ पुर्जी जारी भए पछि उनी अहिले सम्म पक्राउ परेका छैनन् ।
गत साउन २० गते नवलपरासी जिल्ला अदालतले यादवलाई पक्राउ पुर्जी जारी गरेकोमा उनले उच्च अदालत तुलसीपुर बुटवल इजलासबाट निषेधाज्ञा जारी गराएका थिए । २९ गते उच्च अदालतले अल्पकालिक अन्तरिम आदेशलाई निरन्तरता दिनु नपर्ने ठहर गरे सँगै यादवलाई पक्राउ गर्ने बाटो खुलेको थियो ।
यस विषयमा विभिन्न सञ्चार माध्यमहरूमा समाचारहरू आए सँगै यादवले एक विज्ञप्ति जारी गरी सञ्चार माध्यम तथा सामाजिक सञ्जालमा आएका समाचार, टिप्पणी वा धारणा हेरेर कुनै निष्कर्षमा नपुग्न र निष्पक्ष अनुसन्धानबाट सत्य तथ्य बाहिर आउने विषयमा विश्वास गर्न आग्रह गरेका थिए । उनले सम्मानित अदालतको न्यायिक सम्मान गर्दै यथाशीघ्र न्यायिक निकायमा उपस्थित भइ न्यायिक प्रकृयामा सहभागि हुने विज्ञप्तिमा उल्लेख गरेका थिए ।
सामाजिक सञ्जाल मार्फत विज्ञप्ति सार्वजनिक गरेका यादव हाल सम्म प्रहरीको सम्पर्कमा छैनन् । पक्राउ पुर्जी जारी भैसकेको अवस्थामा उनलाई पक्राउन गर्नका लागि खोजी कार्य भइरहे पनि हाल सम्म फेला नपरेको जिल्ला प्रहरी कार्यालय पश्चिम नवलपरासीका प्रहरी प्रमुख राम केसीले जानकारी दिए ।
अहिले प्रतापपुर गाउँपालिकाको कार्यवाहक अध्यक्षको जिम्मेवारी उपाध्यक्ष मानकुमारी चौधरीले लिएकिछिन्। चौधरीले आफूलाई अध्यक्ष यादवले पत्र मार्फत कार्यवाहक अध्यक्षको जिम्मेवारी दिएको बताईन्।
