काठमाडौँ। रसुवा, नुवाकोट र धादिङमा हालै आएको विनाशकारी बाढी तथा पहिरोका कारण ज्यान गुमाएका नागरिकहरूको १३औँ दिनको पुण्यतिथिमा नेपाल शैक्षिक परामर्श व्यवसायी महासंघले काठमाडौँको माइतीघर मण्डलामा दीप प्रज्वलनसहित श्रद्धाञ्जली कार्यक्रम सम्पन्न गरेको छ।
महासंघको आयोजनामा सोमबार साँझ सम्पन्न कार्यक्रममा शैक्षिक परामर्श क्षेत्रका विभिन्न संघ–संस्थाका अध्यक्ष, पदाधिकारी, प्रतिनिधि तथा व्यवसायीहरूको उल्लेखनीय सहभागिता रहेको थियो। महासंघअन्तर्गत आबद्ध विभिन्न शैक्षिक परामर्श व्यवसायी संघ–संस्थाहरूको सामूहिक सहभागितामा आयोजित कार्यक्रममा सहभागीहरूले दीप प्रज्वलन गर्दै प्राकृतिक विपत्तिमा ज्यान गुमाउने सम्पूर्ण दिवंगत आत्माहरूको चिरशान्तिको कामना गर्दै भावपूर्ण श्रद्धाञ्जली अर्पण गरेका थिए।
कार्यक्रमले शैक्षिक परामर्श क्षेत्रका विभिन्न संघ–संस्थाबीचको एकता र सामाजिक उत्तरदायित्वलाई समेत प्रस्तुत गरेको थियो। सहभागी संघ–संस्थाका प्रतिनिधिहरूले विपत्तिबाट प्रभावित परिवार तथा समुदायप्रति ऐक्यबद्धता जनाउँदै राहत, उद्धार तथा पुनर्स्थापनाका कार्यमा आवश्यक सहयोग र सहकार्य जारी राख्ने प्रतिबद्धता व्यक्त गरेका थिए।
कार्यक्रममा महासंघका अध्यक्ष राजेन्द्र बरालले बाढी तथा पहिरोमा ज्यान गुमाउनेहरूप्रति गहिरो दुःख व्यक्त गर्दै शोकसन्तप्त परिवारजनप्रति हार्दिक समवेदना प्रकट गर्नुभयो। उहाँले विपत्तिबाट प्रभावित नागरिक तथा समुदायप्रति नेपालका शैक्षिक परामर्श व्यवसायीहरूको साझा ऐक्यबद्धता रहेको बताउनुभयो।
अध्यक्ष बरालले भन्नुभयो, “यो दीप प्रज्वलन केवल श्रद्धाञ्जलीको कार्यक्रम मात्र होइन, विपत्तिमा आफ्ना प्रियजन गुमाएका परिवार र प्रभावित समुदायप्रति शैक्षिक परामर्श क्षेत्रको सामूहिक ऐक्यबद्धता प्रकट गर्ने माध्यम पनि हो। विभिन्न शैक्षिक परामर्श संघ–संस्थाहरूको सहभागिताले हामी दुःखको यस घडीमा एकताबद्ध भएर प्रभावित नागरिकसँग उभिएको सन्देश दिएको छ।”
उहाँले प्राकृतिक विपत्तिबाट प्रभावित क्षेत्रमा उद्धार, राहत तथा पुनर्स्थापनाका कार्यलाई प्रभावकारी रूपमा अगाडि बढाउन सरकार, निजी क्षेत्र, सामाजिक संघ–संस्था तथा नागरिक समाजबीच सहकार्य आवश्यक रहेको बताउनुभयो।
अध्यक्ष बरालले महासंघ र यसअन्तर्गत आबद्ध विभिन्न संघ–संस्थाहरूले विपत्तिपछि राहत तथा सहयोगका लागि आफ्ना तर्फबाट पहल गरिरहेको उल्लेख गर्दै आगामी दिनमा पनि प्रभावित समुदायको आवश्यकता र अवस्थाअनुसार सहयोगलाई निरन्तरता दिने प्रतिबद्धता व्यक्त गर्नुभयो।
महासंघले प्राकृतिक विपत्तिबाट प्रभावित नागरिकको पीडामा शैक्षिक परामर्श क्षेत्र एकताबद्ध रहेको जनाउँदै राहत, पुनर्स्थापना तथा सामाजिक उत्तरदायित्वका कार्यमा आगामी दिनमा समेत सक्रिय सहभागिता जनाउने जनाएको छ।
दीप प्रज्वलन कार्यक्रममार्फत महासंघ र आबद्ध विभिन्न शैक्षिक परामर्श व्यवसायी संघ–संस्थाहरूले बाढी तथा पहिरोमा ज्यान गुमाउनेहरूप्रति श्रद्धाञ्जली अर्पण गर्नुका साथै शोकसन्तप्त परिवार र प्रभावित समुदायप्रति ऐक्यबद्धता प्रकट गरेका छन्।
