परासी,२७ भदौ / नारायणी नदीको बाढीले घरबास र सम्पत्तिमा क्षति भए पछी कठिन जीवन बिताउन बाध्य नवलपरासीको सुस्ताका बाढीपीडितलाई राष्ट्रिय प्रजातन्त्र पार्टी (राप्रपा) नवलपरासीले राहत सामग्री उपलब्ध गराएको छ।
राप्रपाले आफ्नो पार्टीका सदस्यहरूबाट रकम संकलन गरी सुस्ता–५स्थित नारायणी पारीका बाढी प्रभावित ७९ घरपरिवारलाई चामल, दाल, तेल, साबुन, नुन लगायतका खाद्यन्न तथा लत्ताकपडासहितका अत्यावश्यक सामग्री पार्टीको स्थानीय सुस्ता गाउँ कार्यसमिति मार्फत उपलब्ध गराएको हो ।
हालैको भोटेकोशी- महाविनाशकारी बाढी नारायणी हुँदै सुस्तामा पसेपछि त्यहाँका नागरिक समेत प्रभावित बनेका हुन् ।
राप्रपा नवलपरासीका जिल्ला अध्यक्ष रामभवन यादवले शुक्रबार सुस्ता पुगेर पार्टीको सुस्ता गाउँपालिका कार्यसमितिलाई उक्त राहत सामग्री हस्तान्तरण गर्नुभयो । राहत हस्तान्तरण गर्दै जिल्ला अध्यक्ष यादवले विपद्को समयमा राजनीतिक दलको भूमिका राजनीतिक गतिविधिमा मात्र सीमित नभई पीडित नागरिकको दुःखमा साथ दिने सामाजिक जिम्मेवारीसमेत भएकोले राप्रपाले त्यो भूमिका बहन गरेको बताउनुभयो। उहाँका अनुसार बाढीपछि पार्टीले स्थलगत अनुगमन गरी वास्तविक प्रभावित परिवारको पहिचान गरेको थियो ।
बाढीप्रभावित सुस्तावासीका लागि पार्टीबाट प्राप्त राहत सामग्री ग्रहण गर्दै राप्रपा सुस्ताका अध्यक्ष गोविन्द जोशीले राहत सामग्री वास्तविक प्रभावित परिवारसम्म पु¥याउने जिम्मेवारी स्थानीय पार्टी समितिले लिएको बताउनुभयो।
राहत वितरण कार्यक्रमका संयोजक रमेश क्षेत्रीले भोटेकोशी बाढीका कारण सुस्तावासी विस्थापित हुनुपरेको मात्र नभई सयौँ बिघा जमिनसमेत कटानमा परेकोले सुस्तावासीको पीडामा केही भए पनि राहत पुगोस् भन्ने उद्देश्यले पार्टीले सदस्यहरूबाट रकम संकलन गरी राहत उपलब्ध गराइएको बताउनुभयो ।
विपद्का बेला राज्यका निकायसँगै राजनीतिक दल, सामाजिक संस्था र नागरिक समाजबाट हुने सहयोगले प्रभावित परिवारलाई तत्कालीन राहत मात्र होइन, ‘हामी एक्ला छैनौँ’ भन्ने मनोबलसमेत दिने गर्दछ। राप्रपा नवलपरासीका सदस्यहरूले आफ्नै तर्फबाट रकम जुटाएर गरेको यो पहलले विपद्को समयमा सामाजिक एकता र मानवीय सहयोगको महत्वलाई थप उजागर गरेको छ।
सामग्री हस्तान्तरण कार्यक्रममा राप्रपाका केन्द्रिय सदस्य भरत पाण्डे, नवनित कुमार मिश्रा, पूर्व जिल्ला अध्यक्ष ओमबहादुर सिंह, उपाध्यक्ष ओमप्रकाश चौधरी,जिल्ला सदस्यहरु, रामग्राम नगर समिति उपाध्यक्ष सनद बर्मा, सचिव सुरेश पासवान लगायतको पनि सहभागिता थियो ।
