पुजा लम्साल,सुनवल ।नेपाल मगर संघ केन्द्रिय सहअध्यक्ष दल बहादुर विरकट्टा मगरले आदिवासी जनजातिहरुको भाषा,कला र संस्कृतिको संरक्षण र विस्तारका लागि आफुहरु नै सक्रिय रहनुपर्ने बताउनुभएको छ । आज सुनवलमा सम्पन्न नेपाल आदिवासी जनजाति महासंघ नगर समन्वय परिषद् सुनवल नवलपरासीको छैठौ वार्षिक साधारणसभा तथा दोस्रो अधिवेसन कार्यक्रमलाई सम्बोधन गर्दै उहाले सो कुरा बताउनुभएको हो ।
नेपाल आदिवासी जनजाति महासंघ लुम्विनी प्रदेशका सल्लाहकार समेत रहनुभएका विरकट्टा मगरले विगतका विभिन्न आन्दोलनहरुमा आदिवासी जनजातिहरु सक्रिय भुमिका रहे पनि हाल राज्यको निणर्ायक तहमा आदिवासी जनजातिहरुको उल्लेख्य प्रतिनिधित्व हुन नसक्नु दुखद् भएको बताउनुभयो । राज्यका हरेक क्षेत्रमा आदिवासी जनजातिहरुको उल्लेख्य पहुच र विस्तार हुनुपर्ने उहाको भनाई छ ।
प्रमुख अतिथि विरकट्टा मगरले विविध कारणले आफ्ना हक अधिकारको प्राप्ती र त्यसको उपभोगमा आफुहरुलाई बञ्चित गरिएकोमा आपत्ति जनाउनुभयो ।
नगर समन्वय परिषद्का अध्यक्ष देवबहादुर गुरुङ्गको अध्यक्षतामा भएको कार्यक्रममा महासंघका जिल्ला अध्यक्ष तारा राना, तमु ह्युला छोजधिका केन्द्रिय सल्लाहकार ठाकुर जंग गुरुङ, निर्वतमान जिल्ला सचिव एव्ां सुनवल वडा नं १ का वडाध्यक्ष मानबहादुर थापा मगर, नेपाल तामाङ घेदुङका दोर्जे तामाङ, नेवा दे दवुका जिल्ला सल्लाहाकार काजीमान श्रेष्ठ, सुनवल नगरपालिका वडा नं ३ का वडाध्यक्ष पविन गुरुङ, उद्योग वाणिज्य संघ सुनवलका अध्यक्ष रमेश कर्माचार्य, पुर्व नगर अध्यक्ष वल बहादुर थापा लगायतले शुभकामना मन्तव्य राख्नुभएको थियो ।
उहाहरुले पछिल्लो समय आदिवासी जनजातिहरुको संस्कृति हराउदै गएकाले सर्वप्रथम आफुहरुको भाषा र संस्कृतिको संरक्षणका लागि अनौपचारिक रुपमा भाषा कक्षाहरु सञ्चालन गर्नुपर्ने, राज्यका विभिन्न स्थान तथा संयन्त्रहरुमा समावेशी तथा समानुपातिकबाट नभई प्रत्यक्ष र खुल्ला रुपमा लड्नुपर्ने, तिन तहका सरकारबाट प्रयाप्त बजेट विनियोजन हुनुपर्ने लगायतका कुराहरुमा जोड दिनुभएको थियो ।
महासंघका कोषाध्यक्ष हेमबहादुर थापा मगरको स्वागत मन्तव्य रहेको कार्यक्रमको संचालन उपाध्यक्ष निर्मला शारु मगरले गर्नुभएको थियो । कार्यक्रममा महासंघमा आवद्ध विभिन्न संघ संस्थाका प्रमुख तथा प्रतिनिधि, जनप्रतिनिधि, नगर भित्र बसोवास गर्ने विभिन्न आदिवासी जनजातिहरुको उल्लेख्य सहभागिता रहेको थियो ।
