नवलपरासी । प्रचण्ड माथीको मुद्धा गणतन्त्र सक्काउने खेल रहेको योङ्ग कम्युनिष्ट लिग (वाइसिएल) नेपाल पश्चिम नवलपरासीले जनाएको छ । बिहीबार वाइसिएलका जिल्ला संयोजक मोहन सापकोटाको नेतृत्वको टोलीले प्रमुख जिल्ला अधिकारी मार्फत प्रधानमन्त्री तथा मन्त्रीपरिषद्को कार्यालयमा ५ बुँदे ज्ञापनपत्र पेश गरेको छ ।
ज्ञापन पत्र गरेपछि परासीको बुद्ध चोकमा आयोजना गरीएको कोण सभामा बोल्दै जिल्ला संयोजक मोहन सापकोटाले प्रचण्ड माथीको मुद्धा गणतन्त्र उल्ट्याउने चलखेल भएको बताउनुभएको हो ।
‘एउटा कार्यक्रममा बोलेकै भरमा प्रचण्डलाई ५ हजारको जिल्मा लगाउने भए, जनयुद्धमा राज्यपक्षबाट मारिएका बाँकी १२ हजार जनाको जिम्मा कसले लिने ?’ सापकोटाले भन्नुभयो ।
कोणसभामा वाइसिएल नेपाल पश्चिम नवलपरासीका पुर्व अध्यक्ष हरी भण्डारीले संक्रमणकालीन मुद्धालाई सत्य निरुपण तथा मेलमिलाप आयोगबाट नै टुंगो लगाउनुपर्ने बताउनुभएको थियो ।
नेपालको संविधान र संघिय लोकतान्त्रिक गणतन्त्र विरुद्ध केही प्रतिगामी शक्तिहरुले केही दिन यता अश्वभाविक तरिकाले गतिविधि गरेको प्रति आफूहरुको ध्यानाकर्षण भएको विज्ञप्तिमा जनाइएको छ । त्यस्तो गतिविधिहरु नियन्त्रण गर्न र व्यवस्थाको सुदृढिकरणको लागि माग गरेको विज्ञप्तिमा उल्लेख छ ।
त्यस्तै सत्य निरुपण तथा मेलमिलाप आयोग र वेपत्ता पारिएका व्यक्तिको छानविन सम्बन्धि आयोग गठन गरी संक्रमणकालिन न्यायको बारेमा उठेका विषयहरुको निरुपण गर्न शान्ति प्रक्रियाका बाँकी कामलाई वृस्तित शान्ति सम्झौता र संविधानको भावना र मर्म अनुसार तार्किक निष्कर्षमा पुर्याउन अनुरोध गरिएको छ ।
जनयुद्ध, जनआन्दोलन, मधेश आन्दोलन तथा विभिन्न परिवर्तनका क्रममा शहादत प्राप्त गर्ने योद्धाहरुलाई राष्ट्रिय सहिद घोषणा गर्न र तिनका परिवारलाई सम्मानित वातावरणमा बाच्न सक्ने गरी राहत क्षतिपुर्ति र व्यवस्थापनको लागि माग गरिएको छ ।
वाइसिएलले पछिल्लो समय अर्थतन्त्रमा संकट देखिएको भन्दै यो बेला मिटरब्याजीहरु सलबलाइरहेकोले यसको रोकथाम र नियन्त्रण गरी ओरालो लागेको अर्थतन्त्रलाई बलियो बनाउन पहलकदमी गर्न समेत माग गरेको छ ।
सरकारको विभिन्न निकायहरुबाट भैरहेको भष्ट्राचार, घुसखोरी, अनियमितता र ढिलासुस्तीको रोकथाम र नियन्त्रण गरी जनताको सरकारको रुपमा प्रत्याभुति दिलाउन सरकार समक्ष माग गरेको छ ।
